Multilingual Scriptures Home » Shuar New Testament » James
| Shuar New Testament | ||
| Chapter # | Verse # | Verse Detail |
| 1 | 1 | ¶ Wi Sántiak Uunt Yúsan tura Núnisan ii Uuntri Jesukrístun umirin asan ju papin aajai. Ashí Yus-shuartirmin Ashí nunkanam tsakinmakarum matsatrumna nuna amikmaajrume. |
| 1 | 2 | ¶ Yatsuru, Ashí itiurchat Wáinkiurmesha tuke warastarum. |
| 1 | 3 | Iis, itiurchatnum pujakrum nekas Yus Enentáimtaitkiurmeka katsuntratin unuimiartatrume. |
| 1 | 4 | Tura tuke Páchiachkuram, tuke katsunteakrum, nuikia Yúsjai ti penker katsuartatrume. Penké atsumashtatrume. |
| 1 | 5 | Atum Nánkamsarmek nekaatin tujintiakrumka Yusa nekatairi seata. Shuar seakui Yuska kajetsuk tura ementutsuk antsu patatas Súawai. Tuma asamtai seakminkia suramsattawai. |
| 1 | 6 | Túrasha Yus nekas Enentáimtusam, "Túratpiash" Tútsuk seata. "Cha, nékatsjai surustimpiash" tu seakmeka ántram seame. Nayaantsa tsukaturi Juní taa, Atúu waketki ajatsuk. Amesha aintsamek Túmame. |
| 1 | 7 | Enentáimiin Núnisketkuinkia, seamna nuna Yus penké suramsashtatui. |
| 1 | 8 | Shuar Jimiará Enentáimna nuka shiir wekasatniun tujintiawai. |
| 1 | 9 | Yus-shuar, ju nunkanam Kuítrincha ainia nu, Yus shiir awajsamu nujai warasti. |
| 1 | 10 | |
| 1 | 11 | Tura Yus-shuar Kuítrinniuitkuisha péejchach Enentáimtikramsha warasti. Iis, nupa Kuánkam tura nantu ti sukuam kaar miniatsuk. Kuítrinniuka ántsankete. Tuke Súrutnak pujurkusha itiurchat Wáiniuk Wárik amuukattawai. |
| 1 | 12 | Shíiraiti shuar ni Itiurchatríin nekas katsunteana nuka. Nekapsam Jíinkiunka akinkiatniun Wáinkiattawai. Iwiaaku átinian, tawasap achiktinia Núnisan, Wáinkiattawai Yus ni aneam tsankatka nuna. |
| 1 | 13 | ¶ Shuar Tunáa Túramnia nekapeakka "Yus nuna útsutrutui" tu Enentáimprashtiniaiti. Yuska yajauch Túramnia Enentáimtsui Túrasha Niisha penké chikichkinkesha tunaanum útsuchuiti. |
| 1 | 14 | Antsu ni wakeramurijiain aents tunaan ninki ikiatmamkaiti yajauch Túratniun. Nújainkia tunaanum útsukmaiti. |
| 1 | 15 | Nu yajauch wakeramunmaya Tunáa akiiniui. Tura nu Tunáa mash amuukamtai Jákatin akiiniui. |
| 1 | 16 | Yatsuru, aneakun Tájarme, ananmamawairap. |
| 1 | 17 | Ashí pénker ana nu, Ashí shiir ana nusha nayaimpinmaya Yusak amasuiti. Yus Ashí Tsáapninia nuna najanaiti. Tura Niin kiritin atsain Yapajítsuk tuke Tsáapniiti. |
| 1 | 18 | Nii wakera asa ni nekas chichamea nujai ni uchiri najatmamji. Tura Ashí ukunam átatna nujai ii émkaitji. |
| 1 | 19 | ¶ Tuma asamtai aneamu yatsuru, Wárik chichastin Enentáimprairap antsu antuktin emka Enentáimprata. Núnisan Wárik kajekaip. |
| 1 | 20 | Kajena nuka Yus pénker wakeramun Túratsui. |
| 1 | 21 | Nu asamtai, Ashí pénkercha nu tura Ashí yajauch írunna nusha iniaisata. Tura tuke Enentáijiai Yus-Chicham ame Enentáimin araamu anturkata. Tura nu Chicham kakarmaiti uwemtikrampratniun. |
| 1 | 22 | Yus-Chicham umikta. Aya ántukaip. Aya ántakmeka amek ananmamattame. |
| 1 | 23 | |
| 1 | 24 | Shuar íspikia iimiak ni yapin wapikian Wáiniak tura Nuyá Jáupmitsuk we, ni urukuit nuna Wárik kajinmatkishtimpiash. Shuar Yus-Chicham umitsuk aya ántana nuka nujai métekete. |
| 1 | 25 | Yus tana nujai ankant ajasminiaiti. Shuar iispikia iimia aintsan nekas Yus pénker Táman tuke iniaitsuk Enentáimtus, nu shuar kajinmattsuk aya antukchattawai antsu tuke umiktatui. Tura ti shiir waras pujustatui. |
| 1 | 26 | "Nekas Yúsan shiir umirjai" tana nu tura eseer chichaachkunka imia ninki ananmamui tura "Yúsan shiir umirjai" tana nuna ántar tawai. |
| 1 | 27 | Nekas Yus Apa awajitsuk shiir umirkatin Júiti: mitiaikiasha wajesha itiurchatnum pujuiniakuisha Yáintiniaiti tura ju nunkanam Ashí Tunáa ana Nújaisha Máatrashtiniaiti. |
| 2 | 1 | ¶ Yatsuru, ii Uuntri Jesukrístu ti shiir nankaamantua nu enentaimtatirmeka shuar akantratin Enentáimsairap. Shuara Enentái Enentáimtsuk antsu aya Pátatke Wáinmena nujai aents akantram Niisháa Enentáimturairap. |
| 2 | 2 | Iis, iruntrumna nui shuar Kuítrintin Kurí aniyu aweera tura pénker iwiarmampra wayashtimpiash. Tura Núnisan Chíkich Kuítrincha aruta entsaru wayashtimpiash. |
| 2 | 3 | Tura Kuítrinniua nu "Pénkera jui pujusta" Tíchatameash. Tura Kuítrinchaka "Atu wajauta, Túrachkumsha jui nunkansha pujusta" Tíchatameash. |
| 2 | 4 | Nu Tákumka yajauch Enentáimpram Jimiará Enentáijiai aents Enentáimtame. |
| 2 | 5 | Aneamu yatsuru, antuktarum. Ju nunkanam Kuítrincha ainia nuna Yus achikiuiti Ní shuar ajasar Niin nekas enentaimtin ajasartinian. Tura Ashí nayaimpiniam írunna nunasha Yus niin tsankatkattawai. Ashí shuar Yúsan aneena nuna anajmatra asa niin tsankatkattawai. |
| 2 | 6 | Atum antsu Kuítrincha natsant awajearme. Iista, Kuítrinniua nuka Timiá itiurchat awajtamainiatsuk. ¿Nuikia Níichuk ainia achirmak Kapitiánnium japiki Júramprumna nu? |
| 2 | 7 | ¿Nínkichuk ainia Kristu naari shiira nuna ántar pachikiar penké yajauch áujmatainia nu? Tura átumka nuna naari tuke shiir awajkurmin, Ashí shuar "Kristu shuari" Túramainiawai. |
| 2 | 8 | ¶ Yus-Chichamnum ju akupeamu nekas pénkeraiti: "Ame ayashim aneamna Núnismek ame írutramuram aneeta." Nu nekas umirniuitkiurmeka maak. |
| 2 | 9 | Nú enentaijiai Kuítrinniujai chichasminiaiti. Tura Nuyá Kuítrinchajai shiir chichaachkumka, Niisháa Enentáimta asam, nu akupkamu umirkachuitme. Tunáa Túrame. Núnismek Yusa akupeamurijiai amek sumamame. |
| 2 | 10 | Chíkich akupkamu írunna nu Ashí umikiam tura aya chikichik akupkamu umikchamka nuikia Ashí akupkamu umircha ajasume. |
| 2 | 11 | Iis, Ninki Yúsak chichaak Tíchamka "tsanirmawaip." Tura chikichnasha "mankartuawaip" Tímiayi. Nu asamtai, shuar tsanirmatsuk Túrasha mankartakka ni wakeramun umirtsui. |
| 2 | 12 | Kristu ankant awajtamsamtai ii Yamái ni akupeamuri Yúpichuch umirkamniaitji. Nu asamtai nu akupkamujai métek wekakurninkia Yus "pénker Túraitme" turamtatji. Tura umikchakrinkia "pénker umikchaitme" turamtatji. Tura nu Enentáimsar pénker chichasar takasar wekasatniuitji. |
| 2 | 13 | Chikichan waitnentachkunka waitnennatsuk Asutniáttawai. Tura waitnenkratniuitkiurninkia tsawant jeamtai Yus iin waitnentramprattaji. |
| 2 | 14 | ¶ Yatsuru, shuar "Yusan shiir Enentáimtajai" Táyat tura pénker Túrachkuinkia pénkerashit. Nujai uwemprattawak. |
| 2 | 15 | Wátskea, Yus-shuar, aishmansha nuwasha, Entsátáirin tura yurumken atsumashtimpiash. |
| 2 | 16 | Tura ame nékayatmek ayashi atsumana nu Sútsuk Tíchatapash "Pénker Wetá, entsatai entsaram Túram pénker Yurumáta." ¿Nu Sútsuk Tákum pénkerkait? |
| 2 | 17 | Núnisan takatsuk Yus Enentáimtustin ántraiti. |
| 2 | 18 | Tura shuar Tíchanpiash, "Chíkich takaawai tura chikichcha Yúsan shiir Enentáimtawai. Mai pénkerchakait" tichanpiash. Wats, ame Yus Enentáimtamu takatsuk paant inaktusminiashitiam. Tura wi antsu pénker takatrujai Yus Enentáimtamun paant inaktustatjai. |
| 2 | 19 | Nekas Yus chikichkiiti tu Enentáimtame. Nuka pénker Túrame. Túrasha iwianchcha nunasha nékainiawai. Tura umircha ásar ashamainiawai. |
| 2 | 20 | Netse Enentáimpraip. Ashí Yus wakera nu takaachkumka, Yus Enentáimtustin ántraiti. ¿Nu nekaatin wakeramek? Iista. |
| 2 | 21 | Apraáman Yus chicharuk "Winia ti shiir awajtusat tusam ame uchiram Isak maam surusta" tutai suritkiachmiayi. Máachiat suritkiachmiayi. Tura suritkiacham Yus "Pénkeraitme" Tímiayi Apraáman. |
| 2 | 22 | Páantchakait. Apraám Yusa shiir Enentáimtak umirkamiayi. Umirtsuk Yúsan Enentáimtakka nuikia ántar Enentáimtiaayi. Tura umirak Yus Enentáimtamun umikmiayi. |
| 2 | 23 | Nujai Yus-Chicham aarma nu uminkiamiayi. Juiti: Apraám Yúsan shiir Enentáimtusmiayi tura Yus chicharuk Tímiayi "Máakete. Nújainkia tuke pénker Túraitme Wijiai" Tímiayi. Apraámsha nekas "Yusa Amikri" tu Náamkamiayi. |
| 2 | 24 | Páantchakait. Shuar aya Yúsan shiir Enentáimtamujainchuk tura pénker takasmajaisha Yus niin shiir Enentáimtawai. |
| 2 | 25 | Núnisan Raap tsanirmataiyayi. Túmaitiat Israeran suntarin mamikmauta tusar akupkamun ni jeen itiaawar tura úukar Chíkich Jíntianam akupak uwemtikrarmiayi. Nuna Túramtai Yus "pénkeraitme" Tímiayi nincha. |
| 2 | 26 | Ayash wakantichuka Jákachukait. Núnisan Yus Enentáimtustin tura ni wakeramu takaachkurkia, jaka aintsan ántraitji. |
| 3 | 1 | ¶ Atum Untsurí jintinkiartin ajastin wakerukairap. Yus iin, jintinkiartin ájinia Núnaka, nankaamas neka asar, awajiakrin nankaamas Yus Asutiámattaji. |
| 3 | 2 | Iis, Ashí mash ti awajiatsjik. Tura shuar chichaak, aya pénkernak chichaakka, nu shuar tuke eseer Enentáimniuiti. Tura Ayashíisha tuke pénker ana nuna Túriniaiti. |
| 3 | 3 | Kawaisha Enentáimpratai. Jiru wenuchiniam ikiursam ni ayashi Ashí ayantaatsuk. |
| 3 | 4 | Kanusha ti uuntaitiat tura kakaram wéayat ishitiapach wiantaijiai shuar wakera nui ayantarminiaiti. |
| 3 | 5 | Núniskete ii iniai. Timiá ishitiapchitiat awakmaktinia Tímianu chichaatsuk. Ji ishichik kapaajai Ashí numi tsaruaku ekeemakchamniakait. |
| 3 | 6 | Ii iniaisha jijiai métekete. Ashí Tunáa Piákuiti. Tura ii Ayashíin Tunáa Túratniun útsutmaji. Túnkuruanmaya jijiai Ikiapármaiti tura Ashí ii wekajnia nui émeseawai. |
| 3 | 7 | Shuar Ashí yajasman nawamkamin ainiawai. Ashí kajen írunna nunasha, nanamtincha, napincha, tura entsayancha Ashí nawamkaruiti. |
| 3 | 8 | Tura iniaikia penké nawamkachminiaiti. Ti yajauch asa penké nupetkachminiaiti. Iniaikia ti Taráa tseasaiti. |
| 3 | 9 | Nu iniaijiai Yus Apa shiir awajeaji tura nu iniaijiain aentsti yajauch Chichárnaiyaji. Aentsun Yus Niijiai métek-taku najanamaitiatar yajauch chicharnaiyaji. |
| 3 | 10 | Nu iniaijiain pénkersha tura yajauchisha chichaaji. Yatsuru, nuka penké atsutniuiti. |
| 3 | 11 | ¿Púkuninmaya entsa Sáawijiai kusuku Jíinkimniakait? |
| 3 | 12 | Yatsuru, ¿Kushinkiap shuinian nereawak. Munchisha kushinkiapen nerektatuak? Núnisan Púkuninmaya entsa Sáawijiai kusuku Jíinkichminiaiti. Ii iniaijiai Núnisan aya pénkera nu chichastiniaitji. |
| 3 | 13 | ¶ Shuar ti neka Enentái takakna nu, pénker Túrattawai. Nekas nékaitkiunka péejchachia Núnis tuke pénker ana nuna Túrattawai. |
| 3 | 14 | Antsu Atumí Enentáijiai penké yajauch Enentáimtunairum tura atumek pénker pujustin Enentáimtumarum, nékaitiatam pénker Túrachiatam "pénkeraitjai" tiip. Nuka Wáitrame. Nekaska Núchaiti. |
| 3 | 15 | Nú enentaikia Yúsaiyanchuiti. Antsu ju nunkanmayaiti, shuara Enentáiyaiti, Núnisan iwianchnumiaiti Nú enentaikia. |
| 3 | 16 | Shuarsha yajauch Enentáimtunairar tura ninki Enentáimtumainiakui, nujai Ashí meseawai tura Ashí yajauch ti awai. |
| 3 | 17 | Antsu Yusaiya Enentái takakua nu Júnisaiti: Ashí nankaamas emka eseeratin, Nuyá nawamkartin, shiir Ajá, pénker anturnain, waitnenkratin, Ashí pénker Takáa tura anantsuk naka chichamtin. |
| 3 | 18 | Eseera Enentáimsatniusha shiir takawai Ashí shuar pénker ana nuna Túrawarti tusa. |
| 4 | 1 | ¶ ¿Urukamtaitsuk tuke kajernaikiarum ti Máanaisrum pujarum. Mesetnumsha urukamtai wéarum? Júnisaiti: Atumin yajauch Enentái katsuntrachmin útsutmakrumin tuke Máaniarme. |
| 4 | 2 | Wakerarmena nu takustin wakerarme tura nu wakeramu takustin jeachkuram nérentin maarme juruktiaj tusam. Chíkich takakna nujai itit Enentáimtuniarme tura ataitin tujinkiam Máanaitrume. Wakerarmena nusha Yus seachu asarum Wáintsurme. |
| 4 | 3 | Tura seakrumsha yajauch searme. Atumí pénkerijiai warastin Enentáimiu asarum searmena nusha Wáintsurme. |
| 4 | 4 | Jú nunkanmaya wakerakum Yusa nemasrijiai tsanirma aintsanketrume. Nékatsrumek atumsha. Ju nunkanmayan wakerakrikia Yusa nemasrintji. Shuar ju nunkanmayan wakerakka Yusa nemasri ajawai. |
| 4 | 5 | Yus-Chicham juna tawai: Yus ni Wakaní ii Enentáin apujturmasuitji. Nu Wakan iin anenma asa ti akasmatramaji, Táwai. Tura nuna ¿ántrankeash ta? |
| 4 | 6 | Tura anenma asa ti Yáinmaji. Tuma asamtai Yus-Chicham tawai: Kajemtinian Yus iistatui tura péejchachin Yus niin aneak ti shiir Yáintatui, tawai. |
| 4 | 7 | Yusai ikiumastarum, tura íwianch taritratarum. Túrakrumin íwianch ikiurmaktiatui. |
| 4 | 8 | Yúsainí weamkata tura Nii atumin wearmaktatrume. Tunáa shuartiram Kristu numpejai nijiamartarum. Tura átum, Yussha tura ju nunkanmayasha mai métek wakerarmena nu, Atumí Enentái naka eseeratarum. |
| 4 | 9 | Atumí tunaari Enentáimsarum Kúntuts Enentáimpratarum. Nu Kúntutsjai ti uuttiarum. Nuik shiir Enentáimprarum wishikmiarumna nuka iniaisarum Kúntuts Enentáimprarum uuttiarum. |
| 4 | 10 | Yusjai péejchach ajasta, Túrakmin shiir awajtamsattawai. |
| 4 | 11 | ¶ Yatsuru, yajauch áujmatnaisairap. Yus-shuar ni yachin yajauch áujmatas tura Yachí tunaari tuke áujmatuk Yus "aneniatarum" tana nuna umichuiti. Antsu umichu asa "nu akupkamu ántraiti, umirkashtiniaiti" tawai nu shuar. Nujai nu shuar umirtsuk Yus akupkamu nankaamas Enentáimtumawai. |
| 4 | 12 | Yus Ninki akupkamu najana asa Ninki nu akupkamu umirkamun nekas nekaamniaiti tunaashit tusa. Nínkiti uwemtikratniun tura emesratniunam akupkatin jea nu. Amesha Yáitiam chikicha tunaari iistincha. |
| 4 | 13 | Watsek, átum áujmateakrum "Arumsha kashincha nu péprunam weri nui chikichik Uwí takasar kuit achiktatji" Tíchattarpash. |
| 4 | 14 | Ishichkisha penké nékatsrume kashin átatna nu. Ju nunkanam ii iwiaakmari Wárik Amúatsuk. Yurankim utsanar tura nantu sukuam mash Wárik menkaatsuk. Núnisketji. |
| 4 | 15 | Antsu Júnis Tíminiaitrume: "Yus wakerakuinkia iwiaaku pujakrikia nusha Túrattaji" titiarum. |
| 4 | 16 | Túrachkurmeka átumka Yusjai nankaamantu Enentáimprume. Tura Ashí nu Enentáikia yajauchiiti. |
| 4 | 17 | Shuar pénker Túratniun nékayat, Túrachkuinkia, nuka tunaiti. |
| 5 | 1 | ¶ Kuítrinniutiram ju antuktarum. Ti uuttiarum. Ti Wáitsatin asarum ti kakantra uuttiarum. |
| 5 | 2 | Kuítrum mash mamukarai tura iwiarmampramurmesha mash tinkishap Yúkayi. |
| 5 | 3 | Kurirmesha tura Kuítrumsha Ashí ijiakmamkarai. Ijiakmampramurisha ame pénkercha Túram nuna paant iniakmawai. Tura jinium aesamua aintsan ame Kuítrum yajauch awajtamsattawai ayashmiin. Amuukatin tsawant jeamunam anearchamame antsu ame Kuítrum ikiaunkamame. |
| 5 | 4 | Ame takat iniararam ementushim akirarmamna nu "akirkati" turamainiawai. Anearta. Yakiyá Yus, nayaimpinmaya suntara uuntri, nu takartamniu chichamen antukai. |
| 5 | 5 | Ashí ju nunkanam írunna nu wararsaruitrume. Tuma asarum kapunka nuke machararme tura yamaikia Máatin tsawant jeayi. |
| 5 | 6 | "Nu shuar tunaiti" Tíirum tunaachu tsanumprurum Máamarme, tura ninkia surimiakcharmai. |
| 5 | 7 | Nu asamtai, yatsuru, nu Páchitsuk ii Uuntri Kristu tatin Nákastarum. Arakmausha ni arakri pénker tsapaiti tusa yumi yutuktinian shiir enentaijiai Nákatsuk. Yútasua umirmatai esatrurmatai Júuktatjai tusa Nákatsuk. Tura Júurmaksha ti waraatsuk. |
| 5 | 8 | Núnisan atumsha katsuntsatarum tura yawekiirap. Kristu tatin yuntumtemayi. |
| 5 | 9 | Yatsuru, Nuámtak "ju yajauch Túrutui" tunainirap. Tákurminkia Yus iirmastatrume. Nínkichukait nuna iistin tura anearta nu Yúsak Tíjiuch wajatramui. |
| 5 | 10 | Yatsuru, yaunchu Yúsnan etserin Enentáimpratarum. Tuke ii Uuntri Yus timia nuna shiir etserkarmiayi. Túmaitiat Wáitsarmiayi Túrasha pachischarmiayi. Núnisrumek Enentáimsatarum. |
| 5 | 11 | Itiurchatan katsuntainia nuka nekas Shíiraiti, tu Enentáimji. Shuar itiurchatan ti katsuntin ámiayi, ni naari Jup. Tura ni itiurchatri nankaamasmatai Yus ti Núkap Kuítrin susamiayi. Nu nékatsrumek. Ii Uuntri Yus ti waitnenkratchakait. |
| 5 | 12 | ¶ Ju Ashí nankaamas Enentáimtustiniaiti, yatsuru. Ame "ee" Tákumka nekas Titiá. Tura "Atsá" Tákumka nusha nekas Titiá. Nekas chicham chichaachkumninkia Yus iirmastatui. Nu asamtai nayaimsha nunkasha Ashí írunna nusha Páchitsuk, aya Támena nu tuke nekas Atí. |
| 5 | 13 | Wáitakmeka Yus áujsata. Waraakmeka, warasam Kantamám Yus shiir awajsata. |
| 5 | 14 | Yus-shuartiram, shuar Jáakka, Yus-shuara uuntrin untsukti. Tura niisha taarti. Tura Jesusa naari pachikiar asuitijiai jaa shuaran ishichik kuerarti. Túrawar Yúsan áujtusarti nu shuaran. |
| 5 | 15 | Tura "Yus nuna nekas anturtamkattaji" tu Enentáimsar áujsarti. Túrawarmatai jaa shuar pénker ajastatui. Yus niin Tsuártatui. Tura tunaan tura asa Jáakuinkia Yus nu tunaan tsankurattawai. |
| 5 | 16 | Nu asamtai, Atumí Tunaarí paant etsertunaiktarum. Túrarum Yus áujtunaistarum Atumí tunaari tsankurnarat tusarum. Pénker shuar Yúsan tuke Enentáijiai áujeamurinkia ti kakarmaiti. |
| 5 | 17 | Yaunchu Yus-Chichaman etserin ámiayi, ni naari Erías. Niisha iijiai méteketiat yumi yutukai tusa Yusa áujsamtai menaintiu Uwí Nuyá nankaamas yutukchamiayi. |
| 5 | 18 | Ataksha yutukti tu áujsamtai ataksha yutukmiayi tura araksha ataksha tsapainiarmiayi. |
| 5 | 19 | Yatsuru, shuar eseera wekatainmaya kanaakuinkia Chíkich niin waketkitniun yainti. |
| 5 | 20 | Shuar Tunáa shuaran yajauch wekaan awakeakka Jákatniunmaya uwemtikrattawai tura ti Untsurí tunaari tsankurnartatui. |