Multilingual Scriptures Home » Shuar New Testament » 2 Timothy
| Shuar New Testament | ||
| Chapter # | Verse # | Verse Detail |
| 1 | 1 | ¶ Wi Pápruitjai. Yus wakerakui Jesukrístu akatramuri ajasuitjai. Ashí Jesukrístujai tsaninkiarun "Nekas iwiaaku átinian susattajai" Tíniuiti Yus. Tuma asa nuna etserkat tusa akuptukuiti. |
| 1 | 2 | Aneamu uchiru, Timiutéu, ju Papín aateajme. Yus Apasha tura ii Uuntri Jesukrístusha ti anenma ásar waitnentramainiak imiatkinchanum shiir pujustinian yainmakarti. |
| 1 | 3 | Tsawaisha Káshisha Yúsan áujeakun ámin tuke Enentáimtusan ti shiir Yúsan Yúminkiajai. Winia weatur Túrawarmia Nútiksanak Yúsan Enentáimtakun ti shiir awajeajai. |
| 1 | 4 | Kanakmiaj nui eantramiam nuna tuke Enentáimtajme. Ataksha wararnaisatai tusan iitniun wakerajme. |
| 1 | 5 | Yus nekas shiir Enentáimtiniaitmena nuna nékajai. Nukuchrum Ruítiasha tura ame nuku Eunisiasha emka Yúsan nekas Enentáimtin ármiayi. Amesha Núnisketme. |
| 1 | 6 | ¶ Tuma asakmin Tájame: Yusna Takasái tusan winia uwejrun ámin awanteakui Yus kakarman suramsamia nujai atak kakaram takasta. |
| 1 | 7 | Yus Sápij Enentáin suramsachuitji. Antsu kakaram ajastinniasha anenaitniuncha pénker wekasatniuncha suramsaitji. |
| 1 | 8 | Ii Uuntri Jesukrístunu etserkatin natsantraip. Níiniun étserkun sepunam pujamusha étserkum natsantruraip. Antsu Yus kakaram awajtamkui ame étseream nujai shuar yajauch Túramainiakui surimiamtsuk Wáitsatin Enentáimtumarta. |
| 1 | 9 | Ii pénker Túrichu árinin Yus iin anenma asa uwemtikramar pénker Túratniunam apujtamsaitji. Iisha Jesukrístujai tsaninkiaru asakrin tura Yus nuna Túratniun wakerak Túramiayi. Yaunchu ju nunka atsaisha iin tuke waitnentrampramiaji. |
| 1 | 10 | Tura Yamái iin Uwemtikkiartin Jesukrístu Támatai nu anenmamu paant ajasuiti. Niisha Jákatniun nupetak emesramiayi. Tura uwempratin chichamjai Jáchatai iwiaakman paant awajturmaji. |
| 1 | 11 | Nuna etserkat tusa Yus anaitiukmiayi. Tura akattur Israer-shuarchanum akuptukmiayi. |
| 1 | 12 | Túruta asamtai ti Wáitiajai. Túrasha Yúsan nekas Enentáimta asan natsamatsjai. Imiá kakaram asa amuukatin tsawant jeatsain Ashí Wínian susamaj nuna ti penker waitruktatui. |
| 1 | 13 | Shiir chichaman jintintiamajmena nuke emetata. Jesukrístujai tsaninkiu asar Yus nekas Enentáimtaji tura nujai anenkratniuitji. Tuke Núnismek Túrata. |
| 1 | 14 | Yus ámin takasat tusa suramsamu shiir takasta. Tura Yusa Wakani iin pujurtamaj nuna kakarmarijiai Túrata. |
| 1 | 15 | ¶ Asia nunkanmaya shuar mash iniaitiusarmai. Nu nekaachmaashum. Nu shuarnumia Pijirusha Ermujenessha armai. |
| 1 | 16 | Antsu Unisépuru Niisháa shuar amai. Ti nukap shiir Enentáimtikrurmai. Tura wi sepunam pujamuncha natsantrurchamai. Ii Uuntri Kristu ni shuarincha waitnentrarti. |
| 1 | 17 | Rúmanam taasha natsantrutsuk eatak Wáittsuk Iniaitiúschamiayi. |
| 1 | 18 | Ipisiu péprunam pujarin ti yainmakmiaj nu paant nékame. Tuma asamtai amuukatin tsawant jeamtai nincha Uunt Yus waitnentrati. |
| 2 | 1 | ¶ Amesha, Uchirú, Jesukrístujai tsaninkiu asam nu kakarmajai kakaram ajasta. |
| 2 | 2 | Untsurí ántuiniamunam wi etserkamaj nu, shuar umikmin ainia nu jintintiawaram chikichnasha jintintiawarat tusam akupkarta. |
| 2 | 3 | Ame ti penker Jesukrístu suntari asam Wáitsatin katsuntrata. |
| 2 | 4 | Suntarka ni uuntri tana nunak umiktin asa Chíkich takatan pachintiukchatniuiti. |
| 2 | 5 | Núnisan nakurincha nakurustinia nujai métek nakurachkunka nekas pénkeran awakmakun Súsatniua nuna achikchamniaiti. |
| 2 | 6 | Ataksha Núnisan shuar ajan takaana nu, Ashí shuara nankaamas nuyan Yúashtinkiait. |
| 2 | 7 | Wats, ju menaintiu métek-taku chicham ainiawai. Pénker Enentáimtakmin ii Uuntri Kristu paant awajturmastatui. |
| 2 | 8 | ¶ Jesukrístu jaka nantakmia nu Enentáimprata. Tura Uunt akupin Tawit ni weatri asamtai Jesussha uunt akupin átiniaiti. Núiti wi uwempratin chichaman étsereaj nu. |
| 2 | 9 | Nuna étsereakun sepunam jirujai jinkiamu pujakun Wáitiajai. Túrasha Yus-Chicham jinkiachminiaiti. |
| 2 | 10 | Ashí shuar ni shuari arti tusa Yus achikiarua nuna Yáintajtsan Ashí itiurchatan katsunteajai. Nujai Jesukrístujai tsaninkiaru ásar uwemprar tuke shiir pujusartatui Yusjai. |
| 2 | 11 | Ju Imiá nekasaiti: Jesukrístujai Jákaitkiurkia Níijiaisha tuke iwiaaku pujustatji. |
| 2 | 12 | Wáitiakrisha Niijiai akupkattaji. Natsantakrinkia Niisha natsantramprattaji. |
| 2 | 13 | Umichuitkiurniisha Ninkia tuke uminiaiti. Warí, Yuska ni Enentáimmiajain Yapajniátsuk tuke umiktiniaiti. |
| 2 | 14 | ¶ Shuar jintintiakum ju Enentáimtikrata. Ii Uuntri Yus iimmianum chichamjai yajauch tunaiyarain tusam chicharkarta. Nu tunaitin penké aantraiti antsu ántuiniana nuna yajauch awajenawai. |
| 2 | 15 | Yus-Chicham tuke Enentáimjai pénker Unuimiátram shiir jintintiawarta. Túrakum Yus pénker iirsat tusam pénker takarin Atá. Túramka Yusai natsaarchattame. |
| 2 | 16 | Jú nunkanmayanak ántar áujmatin ainia nujai kanaktia. Shuar nuna áujmatainiak tunaanum nuna nankaamas Wáiniawai. |
| 2 | 17 | Ni jintiniamusha sunkurjai métek pampaawai. Iminíusha tura Piritiusha nu shuar ainiawai. |
| 2 | 18 | Niisha nekas chichaman iniaisar tura Ashí Yus-shuar nantaktincha nankaamasai Tuíniakui Chíkich Chíkich shuar Yúsan naka Enentáimtuiniatsui yamaikia. |
| 2 | 19 | ¶ Túrasha Yus Ashí nankaamas Enentáimtustinia nuna paant awajsaiti. Júnisaiti: "Uunt Yus ni shuarin nékainiawai," tura Nuyá "Ashí Kristu shuari ainia nu tunaanumia kanakiarti." |
| 2 | 20 | Kuítrinniu jeen kurijiai najanamusha kuitjai najanamusha írunui. Nújainkia ti shiira nu takastin ainiawai. Tura numijiai najanamusha nuwejai najanamusha írunui. Antsu Nújainkia nekasmiancha ainia nu takastin ainiawai. |
| 2 | 21 | Núniskete Yusa Takatríjiai. Ashí tunaanumia kanakir pénker wekasar shiira nu takasmin átatji. Kame Ashí pénkera nu takasmin asakrin ii Uuntri Jesukrístu wakerak pénker takata nui apujtamsamniaitji. |
| 2 | 22 | ¶ Natsá wakerutai iniaisam esetram pénker wekasata. Amesha Ashí shuar shiir Enentáijiai Yúsan áujena nujai Yus nekas Enentáimtakum aneniakum ti shiir Pujustá. |
| 2 | 23 | Enentáimtsuk chichainiak aya ántar tunaitinian chichainia nu Pachisáirap. Nusha aya némasmanainiawai. |
| 2 | 24 | Ii uuntri Jesukrístu takarniuka Chíkich shuarjai nemasmanaikiashtiniaiti, antsu Ashí shuarjai pénker nawamnaikiatniuiti. Tura Waitnentáimturar pénker jintintiatniuiti. |
| 2 | 25 | Tura umircha shuarnasha Yus ni Enentáin yapajtiakui nekas chichaman shiir Enentáimturarat tusa pénker Enentáijiai jintintiatniuiti. |
| 2 | 26 | Nujai íwianch ni wakeramu Túrawarat tusa achikmaitiatan uwemprartatui. |
| 3 | 1 | ¶ Amuukatin tsawant jeakui ti itiurchat átatui. |
| 3 | 2 | Shuar aya ninki Enentáimtumasartatui. Kuítian ti wakeriartatui. Nankaamantu Enentáimtumarartatui. Yúsnasha yajauch chicharsartatui. Aparíncha umirkachartatui. Yuminsatniuncha nékachu ártatui. Ashí Yúsnancha Enentáimtuschartatui. |
| 3 | 3 | Aneetsuk waitnenkartichu ártatui. Tsanumin ártatui. Ni Ayashí wakeramun katsuncha ártatui. Aya kajen ártatui. Ashí pénker Túrinia nuna nemasri ártatui. |
| 3 | 4 | Amikrincha surukartatui. Arantsuk tunaan Túrawartatui. Waantu Enentáimin ártatui. Yúsan nakitrar aya ni wakeramunak Enentáimtusartatui. |
| 3 | 5 | Yusa kakarmari "ántraiti" Tuíniak pénker umirkachartatui. Túrasha Yúsan umirua Núnisar Túrawartatui. Nu shuar penké Pachisáip. |
| 3 | 6 | Nu shuarsha shiir chichayatan anankawar Jeá Wáiniawai. Tura nuwa esetar Enentáimchan nekas tunaarinniun anankainiawai. Nu nuwa Ashí yajauch wakeramujai anannainiawai. |
| 3 | 7 | Tuma ásar Ashí shuara chichamen tuke ántuiniayatan nekas-chichaman nekaatniun tujintiainiawai. |
| 3 | 8 | Yaunchu Ejiptu nunkanam Muisais uunt akupniujai chichaakui Jimiará iwishin, Jánissha Jámprissha, Muisaisan kajerainiak "ántar tawai" tiarmiayi. Núnisan ju shuar nekas-chichaman nakitiainiawai. Naka Enentáimiainiachu ásar Yúsnan naka Jintíatniun penké tujintiainiawai. |
| 3 | 9 | Túrasha nuna nankaamas kuakchartatui. Shuar ti paant ni netse Túruiniamurin nekarawartatui. Núnisan nu Jimiará iwishniujai Túrunamiayi. |
| 3 | 10 | ¶ |
| 3 | 11 | Tura ámeka wi Tímiaj nu umireame. Wi Yusjai shiir wekaamusha métek Túriniaitme. Wi Enentáimmiasha nékaitme. Aintruiniakui Wáitsamaj nu nékame. Tura Yúsan Enentáimtakun tura anenkratkun shiir Enentáijiai katsuntramjai. Antiukía péprunmasha, Ikiuniu péprunmasha, Ristra péprunmasha Ashí yajauch Túrutawarmatai Wáitsamaj nu paant nékame. Túrasha ii Uuntri uwemtikrurmiayi. |
| 3 | 12 | Nekasaiti, shuar Jesukrístujai shiir Túrataj Tákunka ni nemasri aintiam ti Wáitsatniuiti. |
| 3 | 13 | Tura Ashí anankartin ainia nusha kame Ashí yajauch shuarsha Nú yajauch Túrukiar wétatui. Iwianchjai anankamu ásar chikichnasha anankiar weartatui. |
| 3 | 14 | Antsu ámeka unuimiam nu Imiá nekasaiti tu Enentáimtakum tuke emetata. Jintintramawarmia Nú shuarsha Wáitrichua nu nékame. |
| 3 | 15 | Uchichinmayan Yus-Chicham nékame. Yus-Chichamka uwempratniun jintintramamniaiti. Nusha "Jesukrístu nekas Enentáimtakum uwemprattame" tawai. |
| 3 | 16 | |
| 3 | 17 | Ni Papirin aarat tusa Yus ni shuarin aamtikramiayi. Ashí shuar ni Chichamen nekaawar pénker Túrawarat tusa Túramiayi. Tuma asamtai Yus-Papí shuartin unuiniakartin asa Imiá penkeraiti. Tunáa Túrajnia nu Yus-Papijiai nekamatniuitji. Tura awajiakrincha Yus-Papí Núnaka paant jintintramji. Nuyá naka wekasatniun jintintramji. |
| 4 | 1 | ¶ Ii Uuntri Jesukrístu amuukatin tsawantai Uunt Akupin ajas iwiaakuncha tura Jákaruncha Ashí pénker Túramuncha tura yajauch Túramuncha nekaattawai. Tuma asamtai Niisha tura Yus Apasha iimiainiamunam juna akateajme. |
| 4 | 2 | Uwempratin chicham etserkata. Yúpichuchia nuisha tura itiurchata nuisha tuke etserkata. Yus-Chicham nekas Enentáimtikrarta. Tura shiir Enentáimtusam chicharkam Yáintaj tusam unuiniararta. |
| 4 | 3 | Ukunmanka pénker chichaman nakitrar ii wakeraj Núchik nekaatai tusar, shuar teremak pénker pujuschamnia nekapea aintsan, nankaamas unuimiaru atai tusar, Nánkamas unuikiartinian ti Untsurí eakartatui. |
| 4 | 4 | Nekas shiir chichaman iniaisar ikiuiniak ántar áujmatsamun Enentáimtusartatui. |
| 4 | 5 | Antsu ámeka tuke pénker Túratin wakerakum Ashí itiurchat katsuntrata. Uwempratin chicham étserkum takatrum pénker umikta. |
| 4 | 6 | Ishichik ajasai winia iwiaakmar Yusai surumaktin. Mantamnan nayimpiniam wétin jeatimiai. |
| 4 | 7 | Shuar kakaram maanainia Núnisnak tuke kakaram takasmajai. Tséken pénker tsekea aintsanak yawetsuk takasmajai. Tura Yus-Chichaman nekas akasmatkun pénker Wáinkiaitjai. |
| 4 | 8 | Tuma asamtai tawasap nukajai najanamu tsékena susamua aintsan wisha pénker Túramunam akinkiattajai. Tura aya Wíniak akirkashtatui. Antsu Ashí ni Tátinian shiir Enentáijiai Nákainia nunasha nekas pénkera nuna akikiartatui. |
| 4 | 9 | ¶ Wárik iiraitin Enentáimturata. |
| 4 | 10 | Témas aya Jú nunkanmayanak wakerak ajapa ikiuruk Tisarúnikia péprunam weyi. Tura Kresentisha Karasea nunkanam weyi. Núnisan Títiusha Tarmasia nunkanam weyi. |
| 4 | 11 | Túrawarmatai aya Rúkas wijiai pujawai. Márkus eaka Wáinkiam ame itiartitia. Jui ti penker yainkiamniaiti. |
| 4 | 12 | Tura Tíkikiunka Ipisiu péprunam akupkamjai. |
| 4 | 13 | Tura winiakum nuparam Pushí Trúas péprunam Karpu jeen ikiukmiaj nu takurtuktia. Núnisan nuparam Papísha tura nekaska penké Papí takurtuktia. |
| 4 | 14 | Arejántruka jirujai takawa nu ti yajauch awajtusuiti. Túrutaitkiuisha ni Túramujai métek Yus Akiktí. |
| 4 | 15 | Nu amesha pénker Wáinkiatá. Ii étsereamun penké nakitiawai. |
| 4 | 16 | ¶ Emka akupniunam ayamprumaktaj tusan chichaakui chikichkisha Yáintkiacharmiayi. Antsu sapijmiainiak ikiurkiarmiayi. Yus nu shuaran yajauch Enentáimturcharka maak. |
| 4 | 17 | Tura ii Uuntri Jesukrístu ni kakarmarin surus yaintkiamiayi. Nujai uwempratin chichaman Ashí nunkanam Israer-shuarcha antukarti tusan etserkamjai. Tura Núnisan akupniunmayasha ii Uuntri uwemtikrurmiayi. |
| 4 | 18 | Tura Núnisan Ashí yajauchia Nuyá uwemtikrurmatai Nii akupeana nui nayaimpiniam jeattajai. Ninki tuke shiir awajnasti. Núnisan Atí. |
| 4 | 19 | Piriskancha ni aishri Akirancha amikmainiajai. Núnisnak Unisépuru shuarincha amikmainiajai. |
| 4 | 20 | Erastu Kurintiu péprunam juakmai. Tura Trúpimiunka Miritiu péprunam jaan ikiukmiajai. |
| 4 | 21 | Michá nantu jeatsain iiraitin Enentáimturata. Tura Eupurusha Putentesha Ríniusha Kráutiasha tura Ashí Yus-shuarsha amikmaatmainiawai. |
| 4 | 22 | Ii Uuntri Jesukrístu ámijiai tsanin Pujustí. Tura Yus Ashí pénker waitmakarti. Nuke Atí. |