Multilingual Scriptures Home » Shuar New Testament » 1 Timothy
| Shuar New Testament | ||
| Chapter # | Verse # | Verse Detail |
| 1 | 1 | ¶ Wi Papru Jesukrístu akatramurintjai. Iin uwemtikkiartin Yussha tura ii Uuntri Jesukrístusha winia akuptuku ainiawai. Jesukrístujai métek ti shiir ajastai tusar Nákaji. |
| 1 | 2 | Timiutéu, ju papin aateajme. Wi ujakam Yus-shuar ajasu asam nekas winia uchirua ainkiaitme. Tuma asakmin Yus Apasha tura ii Uuntri Jesukrístusha ti anenma ásar waitnentramainiak imiatkinchanum ti shiir pujustinian yainmakarti. |
| 1 | 3 | Masetúnia nunkanam wéakun "Ipisiu péprunam pujuuta" timiaj Núnisnak Tájame. Shuar nui wait-chichaman jintin ainia nu suritkiarta. |
| 1 | 4 | Niisha Israer-shuara weatrin áujmatsamunak tura ni weatri naari ti Untsurí irurtinniak Yus-Chichamjai nankaamas Enentáimtuiniawai. Nunak áujmatsar tuke ántar tuiniawai. Nu Túramuka Yus Enentáimtusar Niin shiir umirkatniun Yáinmatsji. Tuma asamtai nusha Surítkiatá. |
| 1 | 5 | ¶ Yus-shuar tuke Enentáijiai Yúsan shiir Enentáimtusar tura Tunáa Túrutsuk aya pénkera nuna wakerukar anenkartin ajastin ainiawai. Núnisan pénker ajasat tusar Yus-Chicham étsereaji. |
| 1 | 6 | Chíkich shuar juna iniaisar ántar chichaman áujmatainiawai. |
| 1 | 7 | Yúsnan nékachiat "jintinniuitjai" tuiniawai. Tura unuiniainia nuna nékainiatsui. |
| 1 | 8 | Yus wakeramun nekaatin tura tunaan suritkiatin akupkamuka nekas pénkeraiti. Nu paant nékaji. |
| 1 | 9 | Kame akupniuka pénker shuaran itit awajsatniun akupenatsui. Antsu yajauch shuar juna Túrin ainia nuna itit awajsatniun akupenawai: Tunáa shuarnasha, umichuncha, Yúsnasha tura Ashí Yúsnancha nakitiainia nunasha, Aparín Máinniasha, Nukurín Máinniasha, kame mankartinniasha, |
| 1 | 10 | nuwancha tura aishmannasha tsanirma ainia nunasha, shuaran kasamak juu ainia nunasha, Wáitrinniasha, tsanumniuncha, Ashí nuna itit awajsatniun akupenawai. Kame Ashí pénkercha nuna iwiaratniun akupenawai. |
| 1 | 11 | Núnisan tawai ti shiir uwempratin chicham Yus suramsamajnia nu. Nu chichamnaka etserkatniun Yus pénker asa tsankatrukuiti. |
| 1 | 12 | ¶ Ii Uuntri Jesukrístu shiir Enentáimturu asa Níiniun etserturkat tusa kakarman surusuiti. Túruta asamtai Yúminkiajai. |
| 1 | 13 | Wi Yúsan Imiá yajauch chicharniuyajai. Yus-shuarnasha aintrarmiajai. Yusnasha katsekniuyajai. Túrin ain Yus winia waitnentrurmiayi. Kame Jesuska Yus Anaikiamun nékachu asan wi Túramu yajauchiiti tu Enentáimchauyajai. |
| 1 | 14 | Tura ii Uuntri Jesukrístu ti nekas waitnentrurmiayi. Tura Jesukrístujai tsaninkia pujakui Yus nekas Enentáimtustinniasha tura anenkartin ajastinniasha surusuiti. |
| 1 | 15 | Ju chicham ti nekasaiti. Tunáa Shuáran uwemtikrataj tusa Jesukrístu ju nunkanam taramiayi. Nunasha Ashí shuar nekaatin ainiawai. Tura wikia Ashí shuarjai nankaamas Tunáan Túriniaitjai. |
| 1 | 16 | Ti Tunáa ain Jesukrístu ti anenkartin ana nu paant nekanati tusa Yus winia waitnentrurmiayi Tuma asamtai Chíkich shuar, wijiai métek, Yúsan nekas Enentáimtusar Niijiai tuke iwiaaku pujusartatui. |
| 1 | 17 | Yus tuke jacha asa tuke iniaitsuk akupniuiti. Wáinchataitiat Imiá nankaamas nékaiti. imia Ninki Yúsaiti. Tuma asamtai imia Ninki tuke iniaitsuk ti shiir awajsatniuiti. Núnisan tuke Atí. |
| 1 | 18 | ¶ Uchiru, Timiutéu, Yáunchuya Yus-shuar ámin "Ju shuar pénkeran Túrattawai" Túramarmia Nútiksam yamaikia kakaram Ajástá. Nii timia Enentáimsam suntara aintsam Yúsna kakaram takastin asumprurta. Nuna Tájame. Tura Yus tuke nekas Enentáimtusam tura tunaan Túrawaij tusam anearam Túrata. |
| 1 | 19 | Chíkich shuar tunaajai anearcharu ásar Yúsan ikiukiarmai. |
| 1 | 20 | Iminíusha tura Arejántrusha Núnisan Yúsan ikiukiarmatai uunt iwianchnium surukarmajai. Nujai Yúsan ti yajauch chicharsacharat tusan Túraitjai. |
| 2 | 1 | ¶ Wátsek, emka seajrume Yus áujeakum Yus yuminsam Ashí shuar yainkiat tusam áujtusarta. |
| 2 | 2 | Imiatkinchanum pujusar Yusjaisha tura aentsjaisha shiir Túratai tusar tura Ashí akupin ainia nusha pénker akupkarat tusar Yus áujtustiniaitji. |
| 2 | 3 | Aitkiasar seatin pénker asamtai, uwemtikramajnia Nú Yus wakerawai. |
| 2 | 4 | Ashí shuar nekas chichaman nekaawar uwemprarat tusar wakerawai Yus. |
| 2 | 5 | Aya chikichik Yus awai. Tura Jesukrístu aents ajas Yusjai aentsun nawamnaimtikiartiniaiti. |
| 2 | 6 | Ashí shuara tunaarin akikmatkataj tusa Jákatniunam Jesukrístu surumakmiayi. Tura tsawant jeamtai nu chicham Ashí shuarnum etsernaktiniuyi. |
| 2 | 7 | Nuna Túratniun Yus winia akatar akuptukuiti. Israer-shuarcha nekas chichaman Enentáimtusarti tusa Yus akuptukmiayi. Krístunu asan Wáitrutsuk nekas tajai. |
| 2 | 8 | Nu asamtai aishmankka kajetsuk yajauch tunaitsuk antsu pénker Enentáijiai uweje takuiniar Yúsan áujsarti. |
| 2 | 9 | ¶ |
| 2 | 10 | Núnisan Núwaka iwiarmamuk nekasmiancha pénker Enentáijiai entsararti. Chíkich shuar nu nuwan iis temashmarmarincha, Sháukríncha, kurimkiamuncha, iwiarmampramurincha Núnaka Enentáimtutsuk antsu ni pénker Túrunamun Enentáimtusarti. Núnisan áchatniukait nuwa Yús-shuar ainia nujai. Ni pénker Túramujai nekas shiir awajmamsashtinkiait. |
| 2 | 11 | Núwaka takamtak pujusar umiiniak unuimiararti. |
| 2 | 12 | Nuwanka Ashí iruntramunam unuiniartinniasha tura ni aishrin akupkatniuncha suritiajai. Antsu takamtak pujustiniaiti. |
| 2 | 13 | Yus emka aishmankan Atankan najanamiayi. Nuyá nuwan Epan najanamiayi. |
| 2 | 14 | Tura Yus timian umirkach Atanka anannachmiayi. Antsu Epa ananna asa tunaan Túramiayi. |
| 2 | 15 | Túmaitiat jurertin asa, emesnartinniumia uwempraiti. Tura Yúsan nekas Enentáimtak anenkartiniaitiuk tura esetar Enentáimiuk pénker wekasatniuiti. |
| 3 | 1 | ¶ Shuar Yus-shuaran Wáinkiatniun wakerakka pénker takatan achikiuiti. Nuka nekasaiti. |
| 3 | 2 | Tura Yus-shuaran Wáinin ajastinian wakerakka Chíkich shuar niin yajauch áujmattsachmin átiniaiti. Nuwá apatka áchatniuiti. Niisha pénker esetar Enentáimin naka wekasatniuiti. Iraran ni jeen ti shiir itiaatniuiti. Pénker jintinkratin átiniaiti. |
| 3 | 3 | Nampechusha tura suiir Enentáimtichusha átiniaiti. Aya Kuítian ikiaunkatniun Enentáimtuschatniuiti. Antsu tsanka átiniaiti. Kajechusha átiniaiti. Chikichnancha wakerutkashtiniaiti. |
| 3 | 4 | Ni shuarin shiir akupeakui ni Uchirísha umin tura shiir awajkartin ártiniaiti. |
| 3 | 5 | Kame ni shuarin akupkachminiaitkiunka ¿itiurak Yus-shuaran Wáinkiat? |
| 3 | 6 | Yus-shuaran Wáinniuka yama Yus-shuar ajasu áchatniuiti. Túmaitkiunka ti nankaamantu Enentáimtumak iwianchjai métek tunaan Túrak sumamattawai. |
| 3 | 7 | Yus-shuarchasha niin shiir Enentáimtustin ainiawai. Núnischaitkiuinkia niin yajauch chicharainiakui íwianch Wárik tunaanum ajuartatui. |
| 3 | 8 | ¶ Núnisan Yus-shuaran yaincha pénker asamtai Ashí shuar niin shiir Enentáimtustin ainiawai. Nii tana nuna Tímatrusan umin átiniaiti. Nampechu átiniaiti. Aya Kuítian ikiaunkatniun Enentáimtuschatniuiti. |
| 3 | 9 | Yúsnan ti penker nekaatniuiti. Tura esetar Enentáimsatniuiti. |
| 3 | 10 | Emka pénker iistiniaiti Nuyá pénker wekaakka Yus-shuaran yain átiniaiti. |
| 3 | 11 | Nuwasha pénker asamtai Ashí shuarsha niin shiir Enentáimtustin ainiawai. Tsanumniuchu antsu esetar Enentáimiar nii chichaa ímiatrusan umin átiniaiti. |
| 3 | 12 | Yus-shuaran yainkia nuwan apatkachu átiniaiti. Tura ni Uchiríncha ni shuarincha Ashí shiir akupin átiniaiti. |
| 3 | 13 | Yus-shuaran yayak nekas pénker takaakka shiir Enentáimtusmin asa Páchitsuk Kristu Jesus Enentáimtamun arantsuk etserkamniaiti. |
| 3 | 14 | ¶ |
| 3 | 15 | Wárik iitniun wakerajme. Túmaitiatnak sétaknasha Yus-shuarjai takastin nekaak tusan juna aatjame. Ashí Yus-shuar, iwiaaku Yusna ainia nu, nekas chichaman tuke emetawar akasmatainiawai. |
| 3 | 16 | Maa, Imiá nekasaiti, Yus iwiainturmakma Ashí nankaamas ti penkeraiti. Tura Júiti: Yuska aents ajas Jú nunkanam paant wantinkiamiayi. Yus Wakancha "ti shiiraiti" Niin Tímiayi. Yusa suntarisha Niin Wáinkiarmiayi. Ashí nunkanam nu etsernakmiayi. Túramtai Ashí nunkanmaya shuar umirkarmiayi. Tura nayaimpiniam waketkimiayi. |
| 4 | 1 | ¶ Yusa Wakani ti paant tawai, amuukatin tsawant jeaakui Untsurí aents Yus Enentáimtustinian iniaisar antsu yajauch wakanin nemarsar íwianch Jintíamun anturkartatui. |
| 4 | 2 | Yajauch shuaran anturkartatui. Nu shuar ni Enentái Narúa ainin ásar ni Tunáa Túramun penké Enentáimtichu ainiawai. Tuma asa shiir chichainiayatan Wáitrin ainiawai. |
| 4 | 3 | Nu shuar nuatnaikiatniun suritiainiawai. Núnisan Chíkich Chíkich yurumak Yúatniuncha suritiainiawai. Warí, Yus Ashí yurumkan najana asamtai Yus-shuar nekas chichaman nékainia ásar Yúsan yuminsar Páchitsuk Yuámin ainiawai. |
| 4 | 4 | Ashí Yus najanamu pénker asamtai nakittsuk antsu Yusan yuminsar Yúatniuiti. |
| 4 | 5 | Yus-Chicham tana Nújaisha tura yuiniak Yúsan yuminkias áujsamujai Ashí pénker ajasuiti. |
| 4 | 6 | ¶ Wi Tájamna nu Chíkich Yus-shuar jintintiakmeka Jesukrístu pénker takarin átatme. Tura Ashí Yus-Chicham pénker Jintíamu unuimiaru asam nujai kakaram ajastatme. |
| 4 | 7 | Antar chichamsha tura netse chichamsha Enentáimtutsuk nekas Yusna ana nu Túratin kakaram ajasta. |
| 4 | 8 | Kame ayash kakaram awajsatniusha ishichik pénkeraiti. Antsu Yusna nu Túratin kakaram ajastinkia Imiá pénkeraiti. Yamái ju nunkanmasha Yáinmaji tura ukunmasha Yusjai pujustin asakrin nankaamas pénkeraiti. |
| 4 | 9 | Nu Imiá nekas asamtai Ashí shuar nuna Enentáimtustiniaiti. |
| 4 | 10 | Nekas iwiaaku Yus Ashí shuaran uwemtikramniaiti, tura Ashí Niin Enentáimtuinia Nú shuaran nekas uwemtikratniuiti. Nu chicham Imiá nekasaiti tu Enentáimtakur katsekramainiakrincha kakaram takaaji. |
| 4 | 11 | Nuka Ashí ame Jintíakum akupkatniuitme. |
| 4 | 12 | Ti uuntchaitkiumnisha nakitramprarain. Antsu pénker Túrakum Yus-shuar unuiniarta. Chichammijiaisha, Túramurmijiaisha, anenkratmarmijiaisha, nekas Yus Enentáimtamujaisha, tura esetra Enentáimsam Yusna pénker Túramujaisha niisha Túrawarat tusam iniaktusarta. |
| 4 | 13 | Wi jeatsain Yus-Chicham áujeakum shuar jintintiata. Túram Yus-shuar Ikiakárarta. |
| 4 | 14 | Yus-shuara uuntri Yúsnan takastin anaitiamak uwején awantramsarmai. Nuna Túramainiak "Ju shuar kakarman Yúsnumian takustatui" Túramarmia nu, kakaram ajasam Tímiatrusam Túratá. |
| 4 | 15 | Tuke Enentáimjai wi Tájamna nu Enentáimtakmin ame pénker Túruki wéamun nekaawartatui. |
| 4 | 16 | Túramna nusha tura unuiniamna nusha pénker Wáinmamkata. Nu Túratin pimpikiip. Nu Túrakmeka uwemprattame amesha tura ujainiam nusha uwemtikrattame. |
| 5 | 1 | ¶ Uunta nu kakantraip. Antsu nekas ame apa Nútiksamek chicharkata. Nátsasha nekas ame Yátsumea Nútiksamek shiir awajsarta. |
| 5 | 2 | Nuwa uuntchisha nekas ame Núkua Nútiksamek shiir awajsarta. Nuwa Nátsasha nekas ame umaimia Nútiksam shiir Enentáimjai pénker awajsarta. |
| 5 | 3 | ¶ Waje nekas atsumin ainia nusha Yáinkiarta. |
| 5 | 4 | Tura waje uchirtiniaitkiuinkia tura tirankrinniuitkiuinkia, nu shuar wajen Wáinkiarti. Emka ni shuarin pénker Wáinkiatniun unuimiararti. Ni Aparí anemia Núnis awantuiniak shiir Wáinkiarti. Núnaka Yus ti shiir Enentáimtawai. |
| 5 | 5 | Nekas waje ninki pujana nu Yúsan Enentáimtak tsawaisha Káshisha iniaitsuk Yúsan áujeawai. |
| 5 | 6 | Antsu aya Wárastiniak wakera nuka iwiaakiat jaka aintsankete. |
| 5 | 7 | Tura wajenka ni shuari Wáinkiartí. Yus-shuaran yajauch chicharnaktin Atsutí tusam wi Tájamna nu Ashí Yus-shuar ujakarta. |
| 5 | 8 | Shuar ni jeen pujuinia nuna nekaska Wáinkiatniuiti. Tura Nuyá Chíkich Shuárnasha Yáintiniaiti. Túrachkunka Yus tana nuna Umíatsui, tura Yus-shuarcha nujai nankaamas yajauchiiti. |
| 5 | 9 | Yusa Kuítrijiai Yáinniaiktiniaitkiunka waje sesenta (60) Uwí nankaamas takustiniaiti. Tura chikichik Aíshriniak takusu átiniaiti. |
| 5 | 10 | Ti paant pénker Túrin átiniaiti. Ni Uchirín pénker tsakatmaashit, íraran pénker Táata Tíniuashit, nekasmiancha Enentáimtumar Yus-shuaran Yáiniaashit, Wáitiainia nuna waitnenniuashit, tura chikichnasha pénker Túriniaitkiunka maak. |
| 5 | 11 | Tura sesenta (60) Uwí takakchaka Chíkich wajejai iruraip. Ni ayashi wakeramuri Krístuiya kanamtikiainiawai tura ataksha nuatnaikiatniun wakeruiniawai. |
| 5 | 12 | Tura emka Enentáimtiarmia nuna iniaisar sumamainiawai. |
| 5 | 13 | Nu arantcha nakimiainiak ántar irauwear chikicha itiurchatrin áujmatsachminia nunasha áujmatin ainiawai. |
| 5 | 14 | Nu asamtai waje úchipiak ainia nuka uyurtukar uchin takusarti. Tura nuwa nuatkamu takastinia nuna Túrawartí. Tura ni Túrunamurijiai iin kajertamainiaj Nú shuar yajauch Enentáimturmarcharti. |
| 5 | 15 | Kame nuik Chíkich Chíkich waje Krístuiya kanakiar iwianchin nemarsaru ásarmatai nuna Tájai. |
| 5 | 16 | Aishmansha nuwasha Yus-shuar ainia nu ni shuariin waje ákuinkia Yusa Kuítrin seatsuk nii Yaintí. Nujai Chíkich wajén nekas atsumainia nuna Yusa kuitri Yáintatui. |
| 5 | 17 | ¶ Yus-shuara uuntri Yus-shuaran pénker Wáinkiarua nu, nekas shiir Enentáimtustin ainiawai. Tura akinkiamniasha ainiawai. Nekaska Yus-Chichaman etserkatniuncha tura unuiniartinniasha tuke takaaka Imiá shiir Enentáimtustinaiti. |
| 5 | 18 | Yus-Papiniumsha Núnisan aarmaiti: Jinkiaia saepen pakartaj tusa turu takaak Nájakui ni Nují Jinkiatáshtiniaiti. Antsu ni wakerak yuati. Tu aarmaiti. Tura nu arantcha aarmaiti: Takakmasua nu nekas akinkiatniuiti. Tu aarmaiti. |
| 5 | 19 | Chikichik shuarak Yus-shuara uuntri tunaarin etsertukmatainkia anturkaip. Antsu Jímiarsha menaintiusha tsanumtsuk métek tuiniakui anturkata. |
| 5 | 20 | Chíkich shuarsha ni tunaarin ikiuktinian nakitiainia nu, Ashí iruntramunam chicharkarta. Chikichcha, nuna iisar, ashamkarti. |
| 5 | 21 | Yussha ii Uuntri Jesukrístusha tura nayaimpinmaya suntarsha iimiainiamunam "Túrata" Tájame. Ashí shuarjai Niisháa Enentáimtutsuk métekrak Túrata. |
| 5 | 22 | Yus-shuara uuntri Atí tusam Wárik anaikiaip. Wárik Túramka chikicha Tunaarín sumamattame. Ashí tunaanum penké pachiinkiaip. |
| 5 | 23 | Wakemjai jau asam aya éntsak úmutsuk Karía ishichik pachimpram umarta. |
| 5 | 24 | Chíkich shuara tunaari Wáitsatin Imiá paant ainiawai Wáitsatin tsawant jeatsain. Tura Chíkich shuara tunaarinkia paantcha ainiawai antsu ukunam paant nekanawartatui. |
| 5 | 25 | Núnisan pénker Túramusha ti paant ainiawai. Tura Yamái Páantchaitiat tuke paantcha áchamniaiti. Páchitsuk nekanattawai. |
| 6 | 1 | ¶ Takarniutirmesha, Atumí uuntri ti shiir umirkatarum. Túrachkumninkia Chíkich shuar Yusnasha ii unuiniamuncha yajauch áujmattsartatui. |
| 6 | 2 | Atumí uuntri Yus-shuar ainiakka aya Yusjai yatsum asamtai nakiarchatniuitrume. Antsu nuna nankaamas pénker takarsatniuitrume. Warí, ame yayamna nu Yus-shuarchak ainia, tura ame aneamu yatsumchak ainia. Ame, Timiutéu, tu jintintiata. |
| 6 | 3 | Shuar ti shiir naka chichaman ii Uuntri Jesukrístunu ana nuna nakitiak antsu Niisháa chichaman étserkunka |
| 6 | 4 | nu shuar nankaamantu Enentáimtumayat ántraiti. Ni Enentáimmianak chichaak aya ántar chichaman antumtiknaikiatniun chichaawai. Tura nu chichamjai nupetmaktaj tusar nankaamas áujmatainiak kajernaikiar tura katseknaikiar pénker Enentáimtunaitsuk |
| 6 | 5 | tuke kakannainiawai. Tura tu aujmatnaisatniun wakeruiniana Nú shuar nekas-chichaman nékachu ásar aya tunaan Enentáimtin ainiawai. "Yusna ana nujai Kuítrintin ajasminiaiti" tuiniawai. Nu shuar pachisaip. |
| 6 | 6 | ¶ Shuar takakna nujain waraakka Yusna ana nujaisha waraak ju nunkanmasha tura nayaimpinmasha nekas Kuítrinniuiti. |
| 6 | 7 | Iis, ju nunkanam misuk Támaji; Núnisar misuk jiinkittiaji. |
| 6 | 8 | Tuma asamtai yurumkasha tura entsataisha takakkurkia nujain warasa pujustiniaitji. |
| 6 | 9 | Antsu Kuítrintin ajastaj tuinia nu, tunaanum awankemkar iniainiawai. Tura antra nuna wakerukar itiurchatan Wáiniainiawai. Nujai emesratniunmasha jeainiawai. |
| 6 | 10 | Kame kuit aneatniuka Ashí Tunáanum útsutmakminiaitji. Chíkich shuar nuna wakerukar Yus Enentáimtustinian iniaisar ti itiurchatjai yajauch awajmamsarai. |
| 6 | 11 | Antsu ame Yus-shuar asam Nuyá pisarta. Yus nekas Enentáimtakum pénker Túrata. Waantu Enentáimtsuk Yus pénker umirkata. Aneakum katsuntrata. |
| 6 | 12 | Yusna nu Túrunat tusam kakaram Ajástá. Tuke amuicha iwiaakma emetata. Nu Túratniun Yus anaitiamkaiti, tura ame Yus nekas Enentáimtamu Untsurí shuar iruntramunam etserkaitme. |
| 6 | 13 | ¶ Yuska Ashí iwiaaku átinian Súwiti. Jesukrístusha Punsiu Piratui nekasa nuna ti paant ujakmiayi. Tuma asamtai Yussha Jesukrístusha iirainiamunam nuna Tájame. |
| 6 | 14 | Ii Uuntri Jesukrístu Táatsain wi Tájamna nu Yapajítsuk tura yajauch chicharnakchamnia pénker Umiktá, Tájame. |
| 6 | 15 | Tsawant jeamtai Jesukrístu Tatí tusa Uunt Yus, Imiá penker asa, akupkattawai. Nínkiti Yus. Akupniuncha Akupniuiti. Uuntjai nankaamas Uuntaiti. |
| 6 | 16 | Iwiaaku átinia nérenniuri Nínkiti. Ti Tsáapninnium pujakui nuntumtuachminiaiti. Wáinchatai asamtai shuar penké Wáinkiacharu ainiawai. Ninki Ashí shiir awajsatniuiti tura Ninki tuke Ashí akupin Atí. Núnisan ati. |
| 6 | 17 | Jú nunkanam Kuítrintin ainia nusha nankaamantu Enentáimtumascharti. Kuitcha Yúpichuch menkakamnia asamtai Kuítniak Enentáimtusar pujuscharti. Antsu iwiaaku Yus Ashí iin ti penkeran Núkap Súramaj nuna nekas Enentáimtusarti. |
| 6 | 18 | "Pénker Túratarum" tiarta. Tákumin niisha shiir Enentáijiai ni takakman ajamsarti. Nuyá Nú pénker Túramujai Yusai Ikiáunkartí. |
| 6 | 19 | Nuna Túruiniak Kuítriniawartatui. Núnisan tuke iwiaaku átinian Wáinkiartatui. |
| 6 | 20 | Timiutéu, Ashí ame Túratniua nu tuke Enentáimturta. Jú nunkanmaya ántar chichainia nu anturkaip. Tura Wáitruiniak "wi Imiá nékajai" tuinia nusha anturkaip. |
| 6 | 21 | Chíkich shuar nuna umirkar Yusaiya kanakiarai. Wátsek, Timiutéu, Yus shiir yainmakti. Nuke Atí. |