Multilingual Scriptures Home » Shuar New Testament » Romans
| Shuar New Testament | ||
| Chapter # | Verse # | Verse Detail |
| 1 | 1 | ¶ Wi Papru Jesukrístu Takarniuitjai. Núnisan Yusachirak ni Shiir chichamen etserkat tusa akatar akuptukmiayi. |
| 1 | 2 | Nu Chichaman yus yaunchu "akupkattajai" Tímiayi. Núnaka Yúsnan etserin Yus-papinium paant ujakarmiayi. |
| 1 | 3 | Nu Chichamnum Yus ni Uchirin áujmatui. Ayashijiainkia Tawit weeanum akiiniamiayi. |
| 1 | 4 | Tura ni ti shiir Wakaníjiainkia Yusa Uchirínti. Tura ti kakarmaiti. Jakamunmaya nantakmiajai nekas Yusa Uchiría nu, paant nekanamiayi. Niisha ii Uuntri Jesukrístuiti. |
| 1 | 5 | Ni Túramujai Yus shiir Enentáimturuk nu Shiir Chichaman etserkat tusa akuptukmiayi. Núnisan Ashí nunkanmaya shuar nu chichaman umirkar Jesusa Náarin shiir awajsarat tusa akuptukmiayi. |
| 1 | 6 | Atumsha Nuyá shuaraitrume. Tura Jesukrístunu ajasarat tusa Yus achirmakuitrume. |
| 1 | 7 | Ashí Yus aneamutirmincha Rúmanam matsatrum nuna ju papin aateajrume. Yus ti pénker awajtamsatniun wakerutmarme. Ii Aparí Yussha ii Uuntri Jesukrístusha waitnentramainia ásar imiatkinchanum ti shiir pujustinian yainmakarti. |
| 1 | 8 | ¶ Emkasha, átum Yus nekas Enentáimtamun Ashí nunkanam áujmatenan nekaan Jesukrístun pachisan Yúsan ti shiir yuminsajai. |
| 1 | 9 | Tuke Enentáirjai Yusa Uchirín Ashí shuarnum etsertajai. Túrakui wi atumin tuke áujtamun Yus nékarui. |
| 1 | 10 | Ashí tsawant ni wakerutakuinkia iitjarum tusan Yúsan seajai. |
| 1 | 11 | Nekas iitniun wakerajrume. Nui jean wakanmin yainkian Yusjai kanakchamin Ajasúk tusan wakerajrume. |
| 1 | 12 | Kame atumsha tura wisha Yus nekas Enentáimtuinia asar mai Ikiakánai ajatai tusan wakerajai. |
| 1 | 13 | Yatsurú, tuke iitjarum tusan wakerimjiarme. Túrasha iyatsjarme. Kame Yus-Chichaman ujaakun Chíkich shuarnuma aintsan Atumíincha Yus kakaram takasman Wáinkiatniun wakerajai. |
| 1 | 14 | Wikia Yus akuptuku asamtai Ashí shuaran Ujákártiniaitjai. Unuimiaruncha tura unuimiarchancha, ti nékainia nunasha tura nékachuncha, métekrak ujakartiniaitjai. |
| 1 | 15 | Tuma asan atumniasha Rúmanam pujarmena nunasha Uwempratin Chichaman ujaitjarum tusan pujajai. |
| 1 | 16 | ¶ Nu Shiir Chicham Yusa kakarmarijiai ti kakaram asa Ashí shuaran uwemtikramniaiti. Tuma asamtai natsantatsjai. Nekas Israer-shuarnasha tura Chíkich shuarnasha Núnisan uwemtikramniaiti. |
| 1 | 17 | Nu chichamnum Yus Enentáimsamia nu Páantaiti. Júiti: Ayatik Yúsan nekas Enentáimtuiniakui Yuska "pénkeraitme" Tíminiaiti. Yus-Papiniumsha Núnisan tawai: "Yúsan nekas Enentáimta nuna Yus "pénkeraitme" tutai tuke Yusjai shiir wekasattawai." Tu aarmaiti. |
| 1 | 18 | Shuar nekas chichaman nakitrar yajauchin Túrataj tusar suriimiainiawai. Túrawar tuke tunaarintin ainiawai. Nu shuaran Yus ti kajerkar ti Asutiátniun nayaimpinmaya paant awajsaiti. |
| 1 | 19 | ¶ Tura nu shuarka Ashí Yusna nekaamnia nuna Yus paant awajsa asamtai pénker nékainiawai. |
| 1 | 20 | Kame Yámankamtaikniumia Yus Wáinchataitiat ni najanamurijiai juka paant nekaamniaiti: Nekas Yus asa tuke kakarmaiti. Nusha ti paant asamtai nu shuar tsankurnarchartatui. |
| 1 | 21 | Yúsan nékainiayat shiir awajsacharmiayi tura yuminsacharmiayi. Tuma ásar aya ántra nunak Enentáimtuiniak ni Enentái tunaajai piakai. |
| 1 | 22 | Tura ti nekajai Tuíniayat Enentáimcha Núnin ajasarai. |
| 1 | 23 | Túmainiak Jákachmin Yus Imiá shiira nuna iniaisar shuar jakamnia nakumkamun shiir awajenawai. Tura nu arant nanamtinniasha napincha kuntinniasha yajasmancha nakumkar nuna shiir awajenawai. |
| 1 | 24 | Nu asamtai Imiá yajauch Enentáimiainiakui "áanik asati" Tímiayi Yus. Túramtai ti natsanmainian Túrunainiawai. |
| 1 | 25 | Yusna Imiá nekasa nuna nakitrar antsu wait-chichaman anturkar nuna Túrin ainiawai. Tuke Yúsak shiir awajsatniun iniaisar antsu ni najanamun tikishmatainiak shiir awajenawai. "Antsu tuke Yúsak shiir Awajnastí" tajai. |
| 1 | 26 | Nuna Túrin ásarmatai Yus natsanmainia nuna wakeruktinian tsankatkarmiayi. Túramtai nuwasha aishmanjai tsanintinian nakitrar nuamtak yajauch awajnainiawai. |
| 1 | 27 | Núnisan aishmansha nuwajai tsanintinian iniaisar nuamtak aishmankak tsanirmanainiawai. Ti wakerunainiak ti natsanmainia nuna yajauch Túrunainiawai. Tura yajauch Túruiniak ni ayashi Wáitsatniunak sumamawarmiayi. |
| 1 | 28 | Tura tuke Yúsan nakitiainia asamtai ti yajauch Enentáimiainiak penké Túrachminia nuna Túrawarti tusa Yus tsankatkarmiayi. |
| 1 | 29 | Nu shuar ti tunaajai piaku ainiawai. Tsanirmausha aya Kuítniak wakerincha tura yajauch awajin ainiawai. Nu arantcha awakmakun kajerniusha mankartincha tuke Máanaincha anankartincha pénkercha awajkartincha, tsanumniusha ainiawai. |
| 1 | 30 | Nu arantcha chikichnasha yajauch áujmatin ainiawai. Yúsnasha nakitiainiawai. Aimniusha ainiawai. Tura "pénkeraitjai" tiar nankaamantu Enentáimtumainiawai. Tunáa Túratniun eainiawai. Aparíncha Nukuríncha umirainiatsui. |
| 1 | 31 | Enentáincha ainiawai. Tana nuna umichu ainiawai. Anenkartichu ásar waitnenkartichu ainiawai. Tsankurcha ainiawai. |
| 1 | 32 | Yuska "Shuar nuna Túrinkia Jákatniuiti" taman nékainiayat tuke Túrukin wénawai. Tura nu arantcha Chíkich yajauch Túramtai ti shiir wararenawai. |
| 2 | 1 | ¶ Amesha Enentáimtumastá. "Shuar nu yajauchin Túrana nu Imiá Tunáa shuaraiti" Tákumka amesha métek Túrakum Imiá nekas sumamame. |
| 2 | 2 | Yuska nu tunaan Túrin ainia nuna Súmamtikiashtinkiait. |
| 2 | 3 | Amesha nuna Túrin "Imiá yajauchiiti" Táyatam amesha métek Túrakminkia Yus sumamtikiattana Nuyá ¿itiurak uwemprattam? |
| 2 | 4 | Yus ti waitnentrama asa nu Tunáa ikiukim Niin Enentáimtustinian katsuntramuk Nákarmawai. Tura pénker asa Wárik Asutiámchakui sumamashtiniaitjai ¿tu Enentáimtumamek? Tu Enentáimkium ni waitnentrammari ántar awajsaitme. |
| 2 | 5 | Tura tunaarum Enentáimtutsuk tuke Túrakmeka Súmamtikiatin tsawantai ti Tunáa irutmampramujai ti Asutniáttame. |
| 2 | 6 | Nu tsawantai ni Túramujai métek Yus Ashí shuaran akirartatui. |
| 2 | 7 | Shuar tuke pénker Túrak Ashí shiira nunasha tura tuke amuukachmin ainia nunasha wakeruiniana nuna Yus tuke iwiaaku Niijiai shiir pujustinian Súsartatui. |
| 2 | 8 | Antsu pénkera nuna wakerutsuk antsu aya yajauchin wakeruiniak Yúsan nakitiainia nuna Yus ti kajerak Asutiáwartatui. |
| 2 | 9 | Nekas Israer-shuarsha tura Núnisan Israer-shuarchasha tunaan Túrin ainiakka ti Wáitsartatui. |
| 2 | 10 | Antsu nekas Israer-shuarnasha tura Núnisan Israer-shuarchancha pénker Túrin ainia Núnaka Yus ti shiir imiatkinchanum apujsartatui. |
| 2 | 11 | Yus Ashí shuaran akantsuk mai metek iyawai. |
| 2 | 12 | Shuar Muisais akupkamun nékatsuk tunaan Túraka aya Júnisan sumamawartatui. Tura shuar Muisais akupkamun nékayat tunaan Túranka nu akupkamujai sumamawartatui. |
| 2 | 13 | Akupkamun aya antukarua nuka Yusai pénker ainiatsui antsu antukar umirainia nuna Yuska "pénkeraiti" tawai. |
| 2 | 14 | Israer-shuarchaka Muisais akupkamun takakainiachkusha aya ni Enentáijiai nu akupkamun umirainiak |
| 2 | 15 | nu umireamujai Yus nu akupkamun ni Enentáin ikiursarua nuka paant nekaamniaiti. Nujai métek Túruiniak shiir Enentáimiainiawai. Tura métek Túruiniachkunka pénkercha Enentáimiainiawai. |
| 2 | 16 | Wi Uwempratin Chichaman étsereaj nui Ashí shuar uukrisha Túramun Ashí paant awajsartatui. Tura nuna etserkatniun Jesukrístun anaitiukmiayi. Nu tsawantai tunaan Túrin sumamawartatui. |
| 2 | 17 | ¶ Ameka "Tura Israer-shuaraitjai. Muisais akupkamun takakkui winia Yúsruka ti shiir Enentáimturui, Tátsumeash. |
| 2 | 18 | Yus wakeramuncha nékajai. Tura akupkamun nekaan pénkera nuna wakerajai, Tátsumeash. |
| 2 | 19 | Wakannium kusuraru ainia nunasha jintintiamniaitjai. Tura Tsáapninian nekamtikiawarminiaitjai, Tátsumeash. |
| 2 | 20 | Akupkamu ti penker neka asan nekasa nuna unuimiaruitjai. Tuma asan nékachuncha ántuiniachuncha jintintiamniaitjai" Tátsumeash. |
| 2 | 21 | Pai, Chíkichka unuiniaitiatmesha ¿urukamtai imia ámeka unuimiatsum? "Kasamkashtiniaiti" tu étsereatsmek. Táyatmesha ¿urukamtai ámeka kasamam? |
| 2 | 22 | "Tsanirmashtiniaiti" Tátsumek. Enta, ¿urukamtai ámeka tsanirmam? "Antar-yusan nakitiajai" Tátsumek. ¿Urukamtai ámeka nu yusa jeenia kasamam? |
| 2 | 23 | Akupkamun takakjai tusam shiir Enentáimtumayatam nu akupkamu umireachkum Yus yajauch awajeatsmek. |
| 2 | 24 | Yus-Papiniumsha Núnis aarmaiti: "Atum pénker umirchamujai Israer-shuarcha Yúsan yajauch chicharainiawai." |
| 2 | 25 | Muisais akupkamia nu Ashí umireakmeka nii timia Núnismek tsupirnaktin pénkeraiti. Tura takamtsuk umireachkumka tsupirnakcha Núnisketme. |
| 2 | 26 | Chíkich shuarsha tsupirnakchaitiat Muisais akupkamun umireakka tsupirnatskesha tsupirnakua aintsankete. |
| 2 | 27 | Nu shuar tsupirnakchaitiat akupkamun Ashí umireak atumin tsupirnakutirmin akupkamu takakuitiatrum umircha asakrumin Súmamtikramawartatui. |
| 2 | 28 | |
| 2 | 29 | Kame nekas Israer-shuarka aya Pátatkechu antsu tuke Enentáijiai Yúsnan wakera Núiti. Núnisan nekas tsupirnaktinkia aya Ayashíjiainchuiti antsu Enentáiniam shiir átinia Núiti. Nekas akupkamu aya aarchamuiti antsu nekas Enentáijiai umirkamua Núiti. Nekas Tú tura Núnaka aents shiir Enentáimtuiniachkuisha Yus shiir Enentáimtawai. |
| 3 | 1 | ¶ Núnis aisha Israer-shuar ainia nu ¿Warí pénkernak takakainia? Tura tsupirnaktincha ¿wariniak Yayá? |
| 3 | 2 | Ti pénkeraiti. Warí, émkaka, Yus ni chichamen Israer-shuaran Súsacharmakia. |
| 3 | 3 | Kame Chíkich Chíkich umichu ainiakui Yus tsankatkamia nuna Nú shuaran Súsachmatainkia nuikia "Yus umichuiti" ¿Títinkiait? |
| 3 | 4 | Pénkea. Antsu Yuska nekas Túratniua nujai métek Ashí Túriniaiti. Shuar umichu ainiakuisha ni Támarin mash umiktatui. Ni tamajai Shuáran Wáitrin awajeakka nusha pénkeraiti. Núnisan Atí. Yus-Papisha métek tawai: "Támena nuna "Imiá nekasaiti" tiartatui, tura Súmamtikramataj Tuíniakuisha nupetmaktatme" tawai. |
| 3 | 5 | Nu arantcha, "Wi tunaan Túramujai Yus Imiá pénkera nuna paant awajeakka ¿urukamtai winia asutiua? ¿Nuka pénkerkait?" Tíchatapash. (Kame aents chichainia Núnisnak tajai.) |
| 3 | 6 | Warí, Yus pénkerchaitkiunka ¿itiurak Ashí shuara tunaarin Súmamtikiawarat? Kame Imiá pénkeraiti. |
| 3 | 7 | Núnisan, "Wi umirkachmajai Yus tuke umiiniana nuna paant awajeaknaka nuikia nujai iin shiir awajsamtai ¿urukamtai "tunaitme" Túruta?" Tíchatapash. |
| 3 | 8 | Warí, "Tunáa Túramujai Yúsan pénker awajeajai," Tú nekas Enentáimpramniaitkiuinkia shuar nuikia "Wats, Ashí pénker áti tusar Tunáa Túratai" Tímin ainti. Kame Chíkich shuar iin kajertamainiak "nuna jintintiainiawai" Túramji. Nu shuar sumamawartin ainiawai. |
| 3 | 9 | Nuikia Israer-shuartikia chikichjai nankaamas ¿pénkerkaitiaj~i? Penkesha. Warí, Israer-shuartisha Israer-shuarchajaisha Ashí métekrak tunaan Túrin ainiawai. Núnaka Jú aarmajai paant awajsaitjai. |
| 3 | 10 | Yus-Papisha Núnisan tawai: "Pénkeran Túrin chikichkisha atsawai. |
| 3 | 11 | Yúsnan nekaatniun nakitiainiawai. Yusnasha eainiatsui. |
| 3 | 12 | Yusnumia kanakiar menkakatniunam wénawai. Chikichkisha pénkeran Túrin penké atsawai. |
| 3 | 13 | Ashí yajauch chichainiak iwiarsamu yama urainiua Núnisan ainiawai. Ni chichamejai tuke anankartin ainiawai. Chichame Napía aintsan najamin ainiawai. |
| 3 | 14 | Aya yajauchin kakaram áujmatin ainiawai. |
| 3 | 15 | Máataj tusa Wárik yujarin ainiawai. |
| 3 | 16 | Aya ti itiurchat ti yajauch awajin ainiawai. |
| 3 | 17 | Shiir pujustinian nékainiatsui. |
| 3 | 18 | Ishichkisha Yúsan ashamenatsui." |
| 3 | 19 | ¶ Yaunchu akupkamun umirkatin ainia Nú shuar aya Tákamtak umirkatin ainiawai. Tuma asamtai Ashí shuar umirkachu ásarmatai Yus nujai Súmamtikiawartatui. Túrakui niisha pachischamin ainiawai. |
| 3 | 20 | Akupkamuka aya ii tunaarin paant awajturmaji. Tuma asamtai akupkamu pénker umirkatniujai Yus "pénkeraitme" turamchamniaitji. |
| 3 | 21 | Yus-Chicham yaunchu aarmanum itiura Yus iin "pénkeraitme" Túramminiaitiaj nuna paant tawai. Kame akupkamujainchuiti. |
| 3 | 22 | Antsu iisha Ashí shuarsha Núnisan aya Jesukrístu shiir Enentáimtakrin Yus "pénkeraitme" Túramminiaitji. |
| 3 | 23 | Kame Ashí shuarti Tunáa Túraitji. Tuma asar Yusjai métek pénker ajastin penké jeatsji. |
| 3 | 24 | Tura Yus iin waitnentrama asa Kuítchajai "pénkeraitme" Túramji. Jesukrístujai uwemtikrampra asa Túramji. |
| 3 | 25 | Tura Krístun akupkamiayi ni jakamujai Ashí tunaan Asakátratniun. Túramtai shuar Niin nekas Enentáimtuiniakui Yus tsankuramniaiti. Yaunchu Tunáa Túramun katsunteak Enentáimtuschamiayi. Yamái tsankuramnia nuna yaunchu Nekáa, nuna Túramniuyayi. |
| 3 | 26 | Tura yamaiya tunaancha tsankureak Ashí shuar Jesusan nekas Enentáimtuinia nuna "pénkeraitme" tuke Tíminiaiti. Kristu jakamujai nuka paant ajasai. |
| 3 | 27 | Nújainkia ii pénker ajasjinia nu "winia kakarmarjai Túrunajai" Tíchamnia asar ¿nankaamantu Enentáimtumarminkaitiaj~i? Penkesha. Warí, akupkamu umitsuk aya Kristu nekas Enentáimtakrin Yus "pénkeraitme" Túramji. |
| 3 | 28 | Nujai Páantaiti. Akupkamu umirtsuk aya Jesukrístu shiir Enentáimtakrin Yus "pénkeraitme" Túramminiaitji. |
| 3 | 29 | Warí, Yuska Israer-shuarnasha tura Núnisan Israer-shuarchancha mai ni Yúsrinchukait. |
| 3 | 30 | Kame aya chikichik Yúschakait. Tura tsupirnakuncha tsupirnakchancha mai metek aya Jesukrístun nekas Enentáimtuiniakui "pénkeraitme" Tíminiaiti. |
| 3 | 31 | Shuar Yúsan shiir Enentáimtamujai pénker ajastin ainiakui nujai ¿akupkamu ántar awajsamukait? Atsá. Antsu nuna nankaamas umirkatin awajsamuiti. |
| 4 | 1 | ¶ Ashí Israer-shuara uuntri Apraám Enentáimtustai. Niisha ¿itiurak Yusjai pénker ajasma? |
| 4 | 2 | |
| 4 | 3 | Ni pénker takasmajai Yusjai pénker ajasuitkiunka nankaamantu Enentáimtumarainti. Antsu Yus-Papí tawai: "Apraám Yúsan shiir Enentáimtakui Yus "pénkeraitme" Tímiayi" tawai. Nu Túramu asa Apraámsha Yus iimmianum nankaamantu Enentáimprachminiaiti. |
| 4 | 4 | Shuar íniamna nu takasmatai ¿aya tsanka asam akiktatmek? Warí, ni takasmanum Páchitsuk akikchatniukait. |
| 4 | 5 | Antsu shuar ni pénker turamuri enentaimtsuk áyatik "Yus Tunáa shuaran pénker awajniuiti" tu Enentáimtakui Yuska tsanka asa "pénkeraitme" tawai. |
| 4 | 6 | Tura pénker Túrachunak Yus "pénkeraitme" takui nu shuar shiir warasminiaiti. Núnisan tawai uunt akupin Tawit: |
| 4 | 7 | "Shuar Ashí ni tunaarin Yus Asakátar tsankuramu ana nuka shiir Enentáimpramniaiti. |
| 4 | 8 | Uunt Yus ni tunaarin Enentáimtachma asa ti warasminiaiti." Tu Tímiayi Tawit. |
| 4 | 9 | ¶ ¿Aya tsupirnakukeash warasminiait? Tura tsupirnakchasha waraschamniakait. Warí, Apraám Yúsan shiir Enentáimtakui Yus "pénkeraitme" Tímiayi. |
| 4 | 10 | Tura Apraám tuke tsupirnatsain Yus nuna Tímiayi. Emka Yus "pénkeraitme" timia Nú ukunam Apraám tsupirnakmiayi. |
| 4 | 11 | Apraám tsupirnatsuk Yúsan shiir Enentáimtusmatai Yus "pénkeraitme" tusa "tsupirnaktiniaitme" Tímiayi. Nújainkia Ashí Yúsan shiir Enentáimtuinia Nú shuar tsupirnatskesha Apraám Weeá ainiawai. Tura nu shuaran Yus "pénkeraitme" tawai. |
| 4 | 12 | Tsupirnakusha aya tsupirnaku asa Apraám Weeá ainiatsui antsu nu arant Apraámjai métek Yúsan shiir Enentáimtuinia nuka Apraám Weeá ainiawai. Kame Apraám tuke tsupirnatsuk Yúsan shiir Enentáimtusmiayi. |
| 4 | 13 | Yaunchu Apraáman Yus chicharuk "Amincha amée Weeá shuarnasha Jú nunkan susattajai" Tímiayi. Nunasha Apraám Yus akupkamun umireakui Tíchamiayi. Antsu Apraám Yúsan nekas Enentáimtakui Yus "pénkeraitme" taku nuna tsankatkamiayi. |
| 4 | 14 | Kame aya akupkamun umirniun Súsatniuitkiuinkia nuikia Yus Enentáimtustin ántraiti. Tura Yus Apraáman timia nusha ántraiti. |
| 4 | 15 | Akupkamu akui shuar umirkachka ti Asutniáshtatuak. Tura atsakuinkia ¿Asutniátniukait? ¿Itiurak umirtsuk ikiuktin? |
| 4 | 16 | Tuma asamtai Yus ti anenkartin asa Niin nekas Enentáimtuinian Ashí tsankatkaiti. Nújainkia Apraám weeasha Yus Apraáman timia nuna Páchitsuk Wáinkiártatui. Iisha Apraámjai métek Yus nekas Enentáimtakur Ní weeaitji. Tuma asamtai Muisais akupkamun umirniuncha tura umirniuchuncha mai metek Ashí iin Yus Ashí Apraáman timia nuna tsankatramkattaji. |
| 4 | 17 | ¶ Kame Yus-Papinium Apraám aatramuiti: "Untsurí shuarsha amée Weeá ajasartatui." Nu asamtai iisha Apraámjai métek Yus shiir Enentáimtakrinkia Yus incha Apraám Weeá aintsan iirmaji. Nú Yuska ti kakaram asa jakancha iwiaaku awajniuiti; tura atsana nunasha ana Nútiksan Nájanui. |
| 4 | 18 | Yus "ti pampantatme" takui Apraám ti uuntach áyat Yus timian Enentáimtak yajutmartinian Nákasmiayi. Nujai Untsurí shuar Ní Weeá ajasarmiayi, Yus timia aintsan. |
| 4 | 19 | |
| 4 | 20 | Apraámsha sian (100) Uwí takakuitiat tura ni nuwé Sarasha Júretsuk uunt ajasmataisha tuke iniaitsuk Yus Tímia nuna nekas Enentáimtusmiayi. "Yus nekasash ta" Tútsuk shiir awajsamiayi. Nujaisha nuna nankaamas kakaram ajasmiayi. |
| 4 | 21 | Tuma asa "nekas Yus tana nuna Páchitsuk umiktatui" tu Enentáimpramiayi. |
| 4 | 22 | Nu asamtai Yus "pénkeraitme" Tímiayi. |
| 4 | 23 | ¶ Tura Yus nekas Enentáimtamunam Yus "pénkeraitme" tana nu aya Apraámnak aatrachmaiti. |
| 4 | 24 | |
| 4 | 25 | Antsu incha Túramji. Iisha Núnisrik ii Uuntri Jesus nekas Enentáimtakrinkia Yus incha "pénkeraitme" turamtatji. Jesuska ii tunaarin jarutramkatniun surunkamiayi. Tura nujai Yus iin "pénkeraitrume" taku Jesusan ataksha iniantkimiayi. |
| 5 | 1 | ¶ Tuma asamtai Yus nekas Enentáimtakrin Yus "pénkeraitme" Túramji. Nujai iisha Yusjai shiir nawamnaikiar pujaji. Núnaka ii Uuntri Jesukrístu ni jakamujai sumartamkamiaji. |
| 5 | 2 | Tura Nii shiir Enentáimtakur Yusai weankaitji. Tura Kristu jarutramkakrin Yus ti anenmaji. Tura tuke anenma asakrin Niijiai métek shiir ajastin Nákakur waraaji. |
| 5 | 3 | Nu arantcha Yamái itiurchat pujayatrik nu itiurchatjai unuimiartatji tusar waraaji. Katsuntratniuncha unuitiamji. |
| 5 | 4 | Tura nu unuimiarar ii katsuntramu paant átatui. Tura Nuyá Yus ti shiir awajtamsattajnia nuka shiir Enentáijiai Nákastatji. |
| 5 | 5 | Nu ti shiir Enentáimsar Nákamujai ananmamtsuji. Yuska ni Shiir Wakanin ii Enentáin pujurtamuk ni anenkartutairin ti paant awajturmaji. Tuma asamtai Yus Túratin Nákajnia nu Imiá nekas wainkiattaji. |
| 5 | 6 | ¶ Iikkia penké uwemprachmin asakrin tsawant jeamtai Kristu Ashí shuara tunaarin jarukmiayi. |
| 5 | 7 | Shuar Chíkich shuaran uwemtikratniun ¿jaruktatuak? Pénker shuar ain jarukchattawai. Kame ti penkeraitkiuinkia jarukchaintiash. |
| 5 | 8 | Antsu ii tuke Tunáa árinin Kristu jarutramkamiaji. Nujai iin ti anenmajnia nuna ti paant iniakturmaji. |
| 5 | 9 | Tura ni numpejai tunaarincha awajsamu asar Imiá nekas Yus Asutiámatniua Nuyá uwempraitji. |
| 5 | 10 | Yusa nemasri áyatar Yusa Uchirí jakamujai yamaikia Yusjai shiir nawamnaikiar pujaji. Nu arant nuikia Kristu tuke iwiaaku asa iijiai tsaninkiu asa Ashí yajauchinmaya uwemtikramar tuke shiir awajtamsattaji. |
| 5 | 11 | Ii Uuntri Jesukrístu jakamujai Yusjai shiir nawamnaikia asar ti waraaji. |
| 5 | 12 | Ayu. Yámankamtaik emka aishman Atan ninki tunaan Túramtai Nú tunaajai Ashí shuar tunaarintin ajasarmiayi. Tura Ashí tunaarintin ajasar mash Jákatin ainiawai. |
| 5 | 13 | Akupkamu atsakuinkia umirkachma nekaachminiaiti. Tuma ain Muisais akupkamu atsaisha tuke tunaan Túrin ármiayi. |
| 5 | 14 | Atan pujumia Nuyá Muisais tuke akupeatsain shuara tunaari paantcha ain Ashí shuar tunaan Túrawar Jákarmiayi. Kame ni tunaari Atanna aintsachauyayi. Atanka Yus akupkamu paant ujakman umirkachmiayi. Antsu nu shuar Yus akupkamu paant nékainiachiatan tunaan Túrin ainiak Jákarmiayi. Tura Atanka Krístujai apatkar Enentáimpratai. |
| 5 | 15 | Atan Tunáa Túramia nujai apatka iisam, Yus iin tsankatramaj nuka nankaamas pénkeraiti. Kame Atan ninki tunaan Túramujai Ashí aents Untsurí armia nu, tunaarintin ainiak, Jákarmiayi. Tura Yus iin ti anenma asa chikichik aishmanjai nuna nankaamas Tí shiiran tsankatramaji. Jesukrístujainkia Untsurí shuaran uwemtikrar ti shiiran tsankateawai. |
| 5 | 16 | Atanka tunaari Imiá yajauch ain nuna nankaamas pénkeran Yus tsankatramkaitji. Iis, aya chikichik tunaan Túramujai aents sumamawarmiayi. Antsu Yus uwempratniun tsankatramaj Nújainkia ti Untsurí tunaan Asakáruiti, tura "pénkeraitme" Túramji. |
| 5 | 17 | Chikichik aishman tunaan Túramujai aents Jákatin ainiawai. Tura nuna nankaamas chikichik aishman Jesukrístu Túramujai ti shiir pujustatji. Kame Yus ti anenma asa ii pénker Túratsrinin "pénkeraitrume" Túramji. Nu asamtai yamaram iwiaakmanum kakaram ajaji. |
| 5 | 18 | Atan tunaan Túramujai Ashí tunaarintin ajasar Jákarmiayi. Núnisan Jesukrístu pénker Túramujai Ashí shuar Yus "pénkeraitme" timia nuka yamaram iwiaakmajai tuke pujusartatui. |
| 5 | 19 | Núnisan chikichik aishman umirkachmajai Untsurí tunaarintin ajasarmiayi. Tura chikichik aishman umirkamujai Untsurí shuar pénker awajnasarmiayi. |
| 5 | 20 | Wats, Tunáa ti paant Atí tusa Yus ni akupkamurin susamiayi. Túrasha ti Tunáa pampaakui Yus nuna nankaamas waitnentramak nu tunaan Asakátramji. |
| 5 | 21 | Shuar tunaan Túrin ásar Jákatin ármiayi. Tura Núnisan ii Uuntri Jesukrístu Túramujai Yus iin "pénkeraitrume" Túramkurin iisha tuke iwiaaku pujustiniaitji. |
| 6 | 1 | ¶ Núnisaitkiuinkia Yus nankaamas waitnentrampratai tusar ¿Tunáa Túrattajik? |
| 6 | 2 | Pénkea. Warí, iikia Tunáa Túrashtin Jákaitji. Jákaka ¿itiurak tunaan Túramniait? |
| 6 | 3 | Imianniutikia Krístujai tsaninkiu asar imianir Niijiai métek jaka aintsar aji. |
| 6 | 4 | Tura imianir Krístujai jaka aintsar métek iwiarnasuitji. Tura Yus ti kakaram asa Krístun jakan iniantkimia Núnisan incha nu kakarmajai yamaram Enentáijiai pénker wekasatniun iniantamkimiaji. |
| 6 | 5 | Krístujai tsaninkiu asar Niijiai métek jaka aintsanketji. Tura Núnisan Niijiai métek nantaktiniaitji. |
| 6 | 6 | Yaunchu Enentáimtainkia Krístujai métek jaka asamtai ii yajauch wakerutain Emenkátrutmakuitji. Tuma asamtai yamaikia penké umirkashtiniaitji. |
| 6 | 7 | Kame ¿Jákaka itiurak tunaan Túrat? Yamaikia ankant ajasuitji. |
| 6 | 8 | Iisha nekas Krístujai Jákaitkiurkia Niijiai métek tuke iwiaaku pujustin Enentáimji. |
| 6 | 9 | Kame Krístuka Chikichkí jaka nantakin asa atakka Jákashtatui. Túmaitkiui atakka ajakrachminiaiti. |
| 6 | 10 | Kristu Chikichkí jaka asa Ashí tunaajai itit awajsachmin Ajasuíti. Tura yamaikia iwiaaku Pujá asa Yúsan shiir awajsatniun pujawai. |
| 6 | 11 | Atumsha Núnisrumek jaka aintsarum Tunáa Túrachmin Enentáimtumastarum. Antsu ii Uuntri Jesukrístujai tsaninkiu asarum iwiaaku pujakrum Yus shiir awajsatarum. |
| 6 | 12 | Nu asamtai tunaaka ayashmiin akuptamkashtiniaitrume. Ayashí wakeramuri umirkashtiniaitrume. Ankantaitrume. |
| 6 | 13 | Atumi Ayashí tunaan Túrat tusarum ikiasairap. Antsu jakamunmaya nantakin asarum Yus wakeramu Túratin surumaktarum. Tura ayashmisha aya pénkernak Túratí tusarum Yus iiktustarum. |
| 6 | 14 | Akupkamu umirkatniujai iwiaaku pujatsrume. Antsu atumin Yus ti anenma asa yamaram iwiaakman suramsaitrume. Tuma asamtai yamaikia tunaaka nupettamkachminiaiti. |
| 6 | 15 | Nuikia akupkamu umirtsuk antsu Yus ti anenma asakrin iwiaaku pujakur ¿"Páchitsuk tunaan Túramniaitjai" Títiatjik? Pénkea. |
| 6 | 16 | Tuke umireajnia nuna takarniurintji. Nuka nékatsrumek. Tura ni takarin ajasam umirkatniuitme. Tuma asamtai Tunáa umirkurkia ni takarniurintji tura umirkar jakattaji. Tura Yus umirkurkia pénker wekasattaji. |
| 6 | 17 | Atumsha Yáunchuka Tunáa umirniuitiatrum ikiukrum yamaikia nekas chicham antukurmena nu nekas Atumí Enentáijiai umirkaitrume. Tuma asamtai Yus ti yuminsatniuiti. |
| 6 | 18 | Yamaikia tunaanumia ankant ajasu asarum ti pénker wekasatniunam pachiinkiaitrume. |
| 6 | 19 | Paant nekaak tusan takarniun pachisan Tájarme. Wats, yaunchu Atumí ayashi Muíjmiainian tura Ashí yajauchin Túrat tusarum tsankamakmarme. Núnisrumek yamaikia Atumí ayashi pénkeran Túrat tusarum tura tuke Yusjai shiir wekasat tusarum tsankamaktarum. |
| 6 | 20 | Atumsha Tunáa umirniuyarme nuikia pénker wekaichauyarme. |
| 6 | 21 | Tura Nújaisha ¿Warí pénkerna Yáinmakmarum? Iista, Yamái natsanmainchakait. Nusha Jákatniunam Júawai. |
| 6 | 22 | Antsu yamaikia, tunaanumia uwempra asarum Yus umirniuitrume. Antsu juka Yusjai shiir wekasatniunam Júawai tura Nuyá tuke iwiaaku pujustatrume. |
| 6 | 23 | Tunáa takarkumka tuke Jákatniun akirmaktatui. Antsu Yuska iikia takaatsrinin penké ántar tuke iwiaaku pujustinian suramsattaji. Ii Uuntri Jesukrístujai tsaninkia Pujá asakrin nuna Túrutmattaji. |
| 7 | 1 | ¶ Enentáimpratarum yatsuru. Jákaka akupkachminiaiti. Aya iwiaakna nu akupkamniaiti. Nu paant nékatsrumek. |
| 7 | 2 | Wats, nuwa Nuátkamu ni aishri iwiaakkui niijiai tsanin pujustiniaiti. Tura aishri jakamtai ankant ajawai. |
| 7 | 3 | Tuma asamtai aishri iwiaakain Chíkich aishmanjai Tsaníakka tsanirmawai. Tura ni aishri jakamtai Chíkich aishmanjai Páchitsuk nuatnakminiaiti tura nuikia tsanirmatsui. |
| 7 | 4 | Núnisrumek atumsha, yatsuru, Kristu Ayashí muchitmari ajasu asarum akupkamu emettachmin jaka aintsarum ajasuitrume. Túrakrum Krístujai nuatnaikiatin aintsarum ankantaitrume. Niisha jakamunmaya nantakniuiti. Yamaikia Krístunu ajasu asar Niijiai tsaninkiar Yus wakeramu pénker Túratniuitji. |
| 7 | 5 | Yaunchu wakerutai umirniuyaj nui akupkamu Enentáimtusar nuna nankaamas yajauchia nu wakerimji tura Jákatniunam juramkimji. |
| 7 | 6 | Antsu yamaikia akupkamu emettachmin jaka asar ankant ajasuitji. Túrunar akupkamu yaunchu aarma nu iniaisar yamaikia Yusa Wakaníjiai Tsaníakur yamaram iwiaakmajai pénker wekasamniaitji. |
| 7 | 7 | ¶ Núnisaitkiuinkia "Akupkamu yajauchiiti" ¿titiajiash? Atsá. Warí, akupkamuka tunaan ti paant awajeawai. Akupkamu "Chikichna wakerukaip" Táchakuinkia wakerukchaajai. |
| 7 | 8 | Tura nu akupkamun Enentáimtakui winia Enentáirui Tunáa ana nu Ashí yajauchin ti wakerumtikrimiayi. Kame akupkamu atsakui tunaan ti Enentáimtichaintjai. |
| 7 | 9 | Yaunchu akupkamun nékachkun Nánkamsanak Enentáimniuyajai. Tura akupkamun nekaan tunaan nekaamjai tura jaka aintsanak ajasjai. |
| 7 | 10 | Tuma asamtai akupkamujai pénker wekasatniuitiatan umirkatniun tujintiakui aya Jákatniunam jurukni. |
| 7 | 11 | Kame Tunáa wakerutainkia nu akupkamujai anankrua pénker iwiaaku pujustinian surutsuk nu akupkamujai Jákatniunam jurukmiayi. |
| 7 | 12 | Tuma asamtai akupkamuka Yusna asa ti penkeraiti. Yajauchichuiti. |
| 7 | 13 | Nuikia ¿pénkera nu Jákatniunam Júrawak? Atsá. Antsu Tunáa wakeruktin Jákatniunam jurukmiayi. Nuna tura asa Tunáa Imiá yajauchia nu nekaamniaiti. Tura Tunáa wakerutai pénker akupkamujai Jákatniunam jurukmiatai, nujai Yus "Tunáa wakerutai Imiá yajauchiiti" tusa paant awajsamiayi. |
| 7 | 14 | ¶ Akupkamuka Yúsnaiti. Nu paant nékaji. Antsu wikia ayashna nuna wakerakun tunaan umireajai. |
| 7 | 15 | Kame Túrajna nuna itiurchat Enentáimtajai. Pénker Túratniun wakeraj nuna Túratsjai. Antsu nakitiaj nuna nekaska Túriniaitjai. |
| 7 | 16 | Akupkamu pénkeran nekaan umirkatniun wakerajai. Túrayatnak umirchaitjai. |
| 7 | 17 | Tuma asamtai Wíchaitjai tunaan wakerakun Túrajna nuka. Antsu winia Enentáirui Tunáa wakerutai Pujá asa nu Túrumtikriniaiti. |
| 7 | 18 | Yaunchu Enentáimtai winia Enentáirui pujana nu penké yajauchiiti. Nuna ti paant nékajai. Tuma asamtai pénker Túratniun wakerayatnak penké tujintiajai. |
| 7 | 19 | Pénker Túratniun wakerayatnak Túratsjai. Antsu tunaan nakitiaj nuna Túrajai. |
| 7 | 20 | Nu asamtai nakitiaj nuna Túrakun Wíchaitjai antsu winia Enentáirui Tunáa wakerutai pujana nu Túriniaiti. |
| 7 | 21 | Júnisaiti. Pénker Túratniun wakerakun aya tunaan ínkiuajai. |
| 7 | 22 | Nekas Enentáijiai Yusa akupkamurin wakerajai. |
| 7 | 23 | Tumai yaunchu Enentáimtai winia Enentáirui pujurtak nupettawai tura nekas wakeraj nuna akirturui. |
| 7 | 24 | Maa, ti waitiajai. Jú ayash wakeramujai Jákatniunmaya ¿yaki uwemtikrurat? |
| 7 | 25 | Yuska ii Uuntri Jesukrístujai Túrutmamniaitji. Tuma asamtai Yúsan ti yuminkiajai. Ayu. Winia Enentáirjai Yus akupkamun umirniuitjai. Antsu winia ayashrujai tunaan umireajai. |
| 8 | 1 | ¶ Jesukrístujai tsaninkiarun Yuska "tunaan Túrawar Jákatniunam wémin ainiawai" tatsui. Nu shuar ni ayashi wakerana nuna umirtsuk Yusa Wakaní wakerana nuna umirainiawai. |
| 8 | 2 | Jesukrístujai tsaninkiu asakrin Yusa Wakaní nekas iwiaaku awajtamsaitji. Tuma asamtai Tunáa Túratniunmaya tura Jákatniunmayasha ankant ajasuitji. |
| 8 | 3 | Ayash wakerutainkia, wi akupkamun Enentáimtakui, nuna nankaamas tunaan wakerumtikrimiayi. Tuma asamtai akupkamuka Yáinkiachminiuyi. Antsu akupkamu tujinkiamia nuna Yus Túraiti. Ni Uchirín ayashtin awajas tunaan jarukat tusa akupkamiayi. Tura nujai ayash Tunáa wakeramun nupetkamiayi. |
| 8 | 4 | Túramtai ii yamaikia ayash wakerana nu umirtsuk tura Yusa Wakaní wakeramu Túrar akupkamu tana nu umirniuitji. |
| 8 | 5 | Ayash wakeramun umirainia nu, ayashnia nunak Enentáimtuiniawai. Antsu Yusa Wakaní wakeramun Páchinia nuka Yúsnan Enentáimtuiniawai. |
| 8 | 6 | Ayashnia nuna Enentáimtuinia Nú shuar Jákatniunam wénawai. Antsu Yúsnan Enentáimtuinia nuka Yusjai shiir nawamnaikiar tuke pujusartatui. |
| 8 | 7 | Aya ayash wakeramun Enentáimtuinia Nú shuar Yusa nemasri ainiawai. Yus akupeamun nakitiainia ásar ni taman umirkatniun penké jeainiatsui. |
| 8 | 8 | Tuma asamtai shuar ni Ayashí wakeramuri warareakka Yúsan shiir awajsachminiaiti. |
| 8 | 9 | Tura átumka ayash wakeramu umirtsuk tura Yusa Wakaní pujurtamkurmin ni wakeramu Enentáimtiniaitrume. Ashí shuar Krísturtin ainia nu ni Wakanin takaku ainiawai. Takakchaitkiunka nuikia Krístunuchuiti. |
| 8 | 10 | ¶ Tura Kristu atumin pujurtamkurminkia Atumí ayashi tunaajai jakamnia ain Yus "pénkeraitme" Túramu asamtai Atumí Wakanínkia nekas tuke iwiaakuiti. |
| 8 | 11 | Yus Jesukrístun jakan iniantkimiayi. Tuma asamtai ni Wakaní Atumí Enentáin pujurtamkurminkia Jesusan iniantkimia Núnisan nu Wakanjai yamaram iwiaakmajai iniantamkittiarme. |
| 8 | 12 | Tuma asamtai, yatsuru, ayash wakeramu penké umirkashtiniaitji. |
| 8 | 13 | Ayash wakeramu umirniuitkiurmeka jakattarme. Antsu Yusa Wakaní pujurtamkurmin ayash wakeramu nupetkarmeka pénker wekasarum nekas iwiaaku átatrume. |
| 8 | 14 | Ashí shuar Yusa Wakaní timiajai métek wekainia nu, nu shuar nekas Yusa Uchirínti. |
| 8 | 15 | Yusa Wakaní iin pujurtamkurin Yusa Uchirí ajasar sapijmiatsuk Yusai weamkar "Aparú" Tímimniaitji. |
| 8 | 16 | Nu Wakan "nekas Yusa Uchirínme" ii Enentáin Túramji. |
| 8 | 17 | ¶ Tura ni Uchirí ajasu asakrin Yus Tímia Núnisan Ashí Níiniun suramsattaji. Krístun Ashí susattana Núnisan incha suramsattaji. Yamái Krístunu takaakur Wáitiakrikia ukunam Krístujai métek ti shiir awajnastatji. |
| 8 | 18 | Maa, Yamái ti Wáitiakrisha ukunmanka nayaimpiniam ti shiir pujakur nu Wáitsamu kajinmatkittiaji. |
| 8 | 19 | Tsawant jeamtai Yus Ashí ni shuarin Niijiai métek ti shiir awajsartatui. Nuin nekas Yusa Uchirí ainia nu ti paant nekanattawai. Nu tsawantan Wáinkiatniun Ashí Yus najanamu írunna nu ti Nákainiawai. |
| 8 | 20 | Ashí Yus najanamia nuna Yámankamtaik ti pénker najanamiayi. Túrasha yajauch ajasmiayi. Nusha Ní neaskeka Túrunachmiayi. Antsu Yus ukunam ataksha iwiarnartin Atí tusa Tunáa wayamunam yajauch ajasat tusa tsankatkamiayi. Tuma asamtai iwiarnartin tsawantan Nákawai. |
| 8 | 21 | Nu tsawantai Ashí Yus najanamu emesnartinniumia uwemprartatui. Tura Ashí Yus najanamuka shuar Yusa Uchirí ajasarua nujai métek shiir awajnasar ankant ajasartatui. |
| 8 | 22 | Yamaisha Ashí Yus najanamu ainia nu, nuwa jatema Wáitia nunis ti Wáitiainiawai. |
| 8 | 23 | Yus najanamuka Ashí Wáitiainiawai. Iisha Yusa Wakaní takakiatar ti Wáitiaji. Tura Yusa Wakaní takakkur Ashí Yus suramsattajnia nu nékaji achiktin. Tuma asar nekas Yusa Uchirí paant awajnastin tsawant Nákaji. Nuisha ii Ayashísha ankant awajnastatui. |
| 8 | 24 | Nu tuke Enentáimtuki wéakur takamtsuk uwemprattaji. Yamái nu Wáinchiatar tuke Nákaji. Warí, ¿Wáinjinia nu Nákajik? |
| 8 | 25 | Tuma asar tuke waincha asar katsuntrar Nákaji. |
| 8 | 26 | ¶ Nu arantcha ii kakarmachu nekapeakrin Yusa Wakaní Yáinmaji. Kame Yus áujsatniusha nékachkurin iin Yáinmaji. ¿Warí seattaj~i tura itiur seatjik? Nu nékatsji. Tura itiurchat pujakur ti Wáitiakrincha Yusa Wakaní iin áujturmaji. |
| 8 | 27 | Tura Yus ii Enentáin Enentáimtaj nuna nékaiti. Tuma asa ni shuari asakrin ni Wakaní ni wakeramujai métek seatramkurin ántawai. |
| 8 | 28 | Yus anea asakrin Ashí nankaatamjinia nujai Yus pujurtamji. Tura nujai pénker awajtamji. Nu paant nékaji. Tura Ni wakerimia Núnisan Ní shuar awajtamsaitji. |
| 8 | 29 | ¶ Yámankamtaiknumia iin nekarmak ni Uchirí Jesukrístujai métek ajasat tusa achirmakmiaji. Nujai Yusa Uchirí Untsurí ajasji. Tura Kristu ii iwiairinti. |
| 8 | 30 | Tura Yus achikmia nuna Niiniu awajsamiayi. Tura nu shuaran "pénkeraitrume" Tímiayi. Tura ti shiir awajsamiayi. |
| 8 | 31 | ¶ Wats, nuikia Yus iin Yáinmakrin ¿yaki iin nupettamkattaj~i? |
| 8 | 32 | Ni Uchiríncha suritramkachmiaji antsu iin jarutramkat tusa akupturmakmiaji. Tura asa ni Uchiríjiai métek ti shiira nuna Ashí suramsashtatjik. |
| 8 | 33 | Yus achikmia Nú shuaran ¿yaki sumamtikiat? Yus Apaka "pénkeraitrume" tiniu asa penké Túrashtatui. |
| 8 | 34 | Tura ¿yaki "jinium Apenáti" titi? Warí, Kristu penké Túrashtatui. Antsu nu shuaran jarukmiayi. Tura nantaki Yusa untsuurini ekemas iin áujturmaji. |
| 8 | 35 | Kristu ti anenma asakrin iin akantamkitin atsawai. Wáitiakrisha, itiurchat ínkiuakrisha, shuar aintramkurnisha, tsukamakrisha, entsatai atsakuisha, Tsúumainjaisha, tura mantamnakrisha, nujai "Kristu anentsui" Tíchamniaitji. Nuka Kristu anenkrattairiya akantamkitin jeatsui. |
| 8 | 36 | Yus-Papniumsha Júnis aarmaiti: "Amée-shuar asar tuke mantamnatin pujaji. Murik Máatniua aintsan Enentáimturmaji." Tu aarmaiti. |
| 8 | 37 | Tuma ain Kristu iin anenma asakrin Niijiai ti nupetmakuitji. |
| 8 | 38 | Kristu anenkrattairiya akantamkitin penké atsawai. Nuna ti paant nékajai. Jákatniusha, iwiaakmasha, nayaimpinmaya suntarsha, Ashí nayaimpinmasha tura nunkanmasha akupin ainia nusha, Yamái írunna nusha, ukunam átatna nusha, |
| 8 | 39 | Yakí írunna nusha, Nunká írunna nusha, kame Ashí Yus najanmu írunna nusha Yusa anenkrattairiya penké akantamkichminiaitji. Yusa anenkrattaisha ii Uuntri Jesukrístu Túrunamujai paant wainji. |
| 9 | 1 | ¶ Yamái Tájana nu Kristu shuari asan Imiá nekasan Wáitrutsuk Tájai. Winia Enentáirsha tura Yusa Wakanísha "nekas tawai" turutainiawai. |
| 9 | 2 | Israer-shuaran waitnentakun ti kuntuts Enentáimjai. |
| 9 | 3 | Wíishuar ainiakui Krístunmaya kanakin yuminnaraintjai nujai Wíishuaran Yáinminiaitkiunka. |
| 9 | 4 | Israer Weeá shuar ainiawai. Tura ni Uchiría ainis Yus achikiaruiti. Yusa wincharisha niijiai pujumiayi. Yaunchu Chicham ni weatrijiai iwiaramuncha tura Muisais akupkamuncha susamiayi. Tura Yusa Jeen Niin shiir awajsatniun jintintiamiayi. Tura ukunam shiir tsankatkattana nunasha ujakmiayi. |
| 9 | 5 | Ni Weatríin Yúsan ti pénker Enentáimtin irunmiayi. Krístusha aents ajas Nú shuarnum akiiniamiayi. Krístuka Uunt Yus asa tura Ashí akupin asa Ninki tuke shiir Awájnastí. Núnisan Atí. |
| 9 | 6 | ¶ Kame Yus Ashí Nii timia nuna Israer-shuaran Súsachmataisha nujai "Yus timia nu uminkiachuiti" Tíchamniaiti. Antsu junis Enentáimpratniuiti: Ashí Israer Weeá ainiayatan Yusjai iismaka Ashí nekas Israer-shuar ainiatsui. |
| 9 | 7 | Núnisan Apraám Weeá shuarsha Ashí nekas ni shuar ainiatsui. Iis, Yus Apraáman Tímiayi "Aya Isak pampanma amee shuarum ártatui." |
| 9 | 8 | Nujai Páantaiti. Shuar aya Apraam Weeá akiinia asa Yus timian Wáinkiashtiniaiti. Antsu Yus timiajai métek akiinia nu nekas Apraám Weeá shuar ainiak Yus timian wainkiattawai. |
| 9 | 9 | Kame Yus Apraáman Tímia nu Júiti: "Tsawant jeamtai jeartiatjame, tura ame nuwem Sara uchin takustatui." Tu Tímiayi. |
| 9 | 10 | Nu arantcha, ii weatri Isaka nuwe Ripikia jimiampramiayi. |
| 9 | 11 | |
| 9 | 12 | |
| 9 | 13 | Nu uchisha akiiniainiatsain pénkernasha tura yajauchincha Túruiniatsain Yus Ripikian Tímiayi: "Iwiairia nu ni patain umirkattawai." Ataksha Núnisan Yus ni Papiriin chichak "Jakupan aneakun Esaun nakitramjai" Tímiayi. Nujainkia Páantaiti. Yus wakerak aya ni Enentáijiain shuaran achikminiaiti. Nu shuar Túrunamu Enentáimtutsuk Túramniaiti. |
| 9 | 14 | ¶ Túriniaitkiui "Yus pénkerchaiti" ¿titiajiash? Atsá. |
| 9 | 15 | Yus Muisaisan Júnis Tímiayi: "Wi wakerajna nunak waitnentrattajai." |
| 9 | 16 | Tuma asamtai shuar ti wakerakuisha tura kakaram takaakuisha aya nujai Yus waitnentatsui. Antsu aya Ní Enentáijiain wakerak waitnentawai. |
| 9 | 17 | Ataksha Yus-Papininum tawai "Yus Ejiptu nunka akupniurin Tímiayi "Amijiai Ashí nunkanam winia kakarmarun nekaawarat tusan uunt akupniun awajsamjame" Tímiayi" tawai. |
| 9 | 18 | Tuma asamtai Yus Nii wakera nuna waitnentawai. Túrasha Ejiptu akupniurin Túramia Núnisan Nii wakera Nú shuaran Enentáin Kátsuram awajtawai. |
| 9 | 19 | Tura "Núnisaitkiuinkia ¿urukamtai shuaran Yus Súmamtikia? turutchatapash. Nii wakerakuinkia ¿itiurkattajik?" turutchatapash. |
| 9 | 20 | Warí, aents asam Yusjai ¿tunaiminkiaitiam? Nuwa pininkian Nájankui Núweka "¿urukamtai Júnis najatam?" Tíminkiait. |
| 9 | 21 | Nuwa wakerakka nu nuwejai amamkuncha tura yukunnasha Nusháa takakmastinian mai najanachminkait. |
| 9 | 22 | Yajauch shuar ti Asutiátin ainiak emesnartinnium wétin ainiawai. Yus nu shuaran Asutiá ni kakarmarin iniaktustaj tayat ti katsuntramiayi. |
| 9 | 23 | Tura katsunteak ni anenkrattairin iniakmasmiayi. Nú arant nuikia iin waitnentramak Shíir enentaijiai pénker awajtamkur ni anenkrattairi ti paantchakait. Nekas Shíir enentaijiai pénker ajasat tusa yaunchu iwiartampramiaji. |
| 9 | 24 | Tura incha, Israer-shuarnumiasha Israer-shuarchanumiasha, ni shuari ajasat tusa achirmakmiaji. |
| 9 | 25 | ¶ Núnisan yaunchu Yúsnan etserin Useas Yus-Papinium tawai: "Wíishuarchan Wíishuar awajsattajai. Aneachmancha aneamu awajsattajai. |
| 9 | 26 | Tura Yus "Wíishuarchaitrume" Tímia Nú shuaran "Nekas iwiaaku Yusa Uchiríniuitrume" ukunam Títiatui." Tu aarmaiti. |
| 9 | 27 | Antsu Isayas Israer-shuaran Páchis Tímiayi: "Israer Weeá ti nankaamas Untsurí ainiayat penké ishichik uwemprartatui. |
| 9 | 28 | Kame Yus yajauchin akupkataj timia nuna takamtsuk Wárik umiktatui." |
| 9 | 29 | Núnisan Isayas ataksha tawai: "Ashí akupeana Nú Yus iin waitnentramachkurninkia Sutuma péprusha Kumura péprusha takamtsuk Jákarmia Núnisan Jákaaji." |
| 9 | 30 | ¶ Wátsek, Israer-shuarcha, Yus iisam ni Túramurijiai "pénkeraitji" tu Enentáimtumainiachunak, Yuska, Nii Enentáimtusam,"pénkeraitrume" Tímiayi. |
| 9 | 31 | Antsu Israer-shuarka pénker akupkamun umiktinian wakeruiniayatan tujintiainiakui nujai pénker ajastinian tujinkiarmiayi. |
| 9 | 32 | ¿Urukamtai tujinkiarma? Yúsan Enentáimtutsuk aya ni pénker Túramujai pénker ajastinian Enentáimtuiniak tujinkiarmiayi. Krístun Enentáimtustinian nakitiainiak shuar kankapen awankemtuktinia Núnisan iniararmai. |
| 9 | 33 | Tura kaya tukumkar iniarchamniakait. Nu asamtai Yus-Papinium Krístun pachis Tímiayi: ""Seun péprunam kayan ikiuajai, tawai Yus. Nu kayanam Israer-shuar tukumkar iniarartatui. Antsu Niin shiir Enentáimtuinia Nú shuar natsaarchartatui" tawai." Tu aarmaiti. |
| 10 | 1 | ¶ Yatsuru, Israer-shuar uwemprarat tusan ti wakerakun Yúsan áujtajai. |
| 10 | 2 | Maa, uwempratniun nékachiatan Yúsan shiir awajsatniun ti wakeruiniawai. |
| 10 | 3 | Túmaitiat Shuáran Yus pénker awajsatniun nékachu ásar aya ni pénker Túramujain pénker ajastinian wakeruiniawai. Tuma ásar Yus pénker Enentáimtamujai pénker ajastinian jeacharai. |
| 10 | 4 | Aya Kristu Enentáimtamujai pénker ajastin asamtai akupkamu umirkatniujai pénker ajastin ántraiti. |
| 10 | 5 | Akupkamujai pénker ajastinian pachis Muisais Tímiayi: "Nuna takamtsuk umirniuka nujai pénker pujustatui." Tu aarmaiti. |
| 10 | 6 | Antsu Krístun Enentáimtus pénker pujustinian pachis shuar juna Tíminiaiti: "Ti itiurchata ainis "¿Yaki nayaimpiniam waka Krístun itiarat~i?" tiirap," tawai. |
| 10 | 7 | Tura ¿Yaki jakamunam we Krístun iniantkit?" tiirap" tawai. |
| 10 | 8 | Tura junasha tawai: "Yus-Chicham Yúpichuch umirkamniaiti. Aya Enentáimjai Enentáimtakum wenumjai ujaktiniaitme." Nu Chicham "Yus Enentáimtustiniaiti" tawai. Nu Chicham tuke étsereaj Núiti. |
| 10 | 9 | Yus Jesusan jakan iniantkimia nu Enentáimtakum tura wenumjai "Jesus winia Uuntruiti" takum uwemprattame. |
| 10 | 10 | Kame Kristu Enentáimtakmin Yus "pénkeraitme" turamtatui Nuyá wenumjai "Jesukrístun Enentáimtajai" Tákum uwemprattame. |
| 10 | 11 | Ataksha Yus-Papinium tawai: "Niin shiir Enentáimtuinia Nú shuar natsaarchartatui." |
| 10 | 12 | ¶ Tuma asamtai Ashí shuar, Israertisha Israerchasha, mai metek Yúsan shiir Enentáimtuinia nuna Yus ti aneak Ashí pénkeran Súawai. Tura Ashí métek ni Uuntrinti. |
| 10 | 13 | Nu arantcha "Ashí shuar Uuntan áujea nu uwemprattawai" Yáunchu Krístunun tu aatramuiti. |
| 10 | 14 | Tura Krístun Enentáimtuiniachusha ¿itiurak Niin áujsarat? Tura Krístun nékainiachusha ¿itiurak Niin Enentáimtusarat? Tura Yus-Chicham ujaachmasha ¿itiurak nekaawarat? Shuar Yus-Chichaman ujaktiniaiti. |
| 10 | 15 | Tura akupkachmasha ¿itiurak Yus-Chichaman ujakarat? Tura shuar Yus-Chichaman etserkataj tusa wéana nuna Yus-Papinium tawai: "Shuar Yusa Shiir Chichamen etserki weana nu ti Shíirchakait." |
| 10 | 16 | Tura Ashí shuar uwempratin chichaman ántuiniayatan umirainiatsui. Isayassha yaunchu aak Tímiayi: "Uuntá, ¿yaki ii étserman antukaruit?" |
| 10 | 17 | Paantchakáit. Kristu Túramu ujakam antuktiniaiti. Tura antukar Krístun shiir Enentáimtustiniaiti. |
| 10 | 18 | Tura ¿Israer-shuar Yus-Chichaman antukcharu ásaran Yúsan Enentáimtuscharma? Atsá. Warí, Yus-Papí tawai: "Ashí nunkanam ni chichame antunkaiti." |
| 10 | 19 | Tura "Israer-shuar nu chichaman antukariat ¿paant nekaawarmaashi?" inintrusminiaiti. Tura nekas nekaawarmai. Tuma asamtai Muisais tawai: "Israer-shuarchan nékachu ainiana nuna shiir awajeakun akajkattajrume." |
| 10 | 20 | Nuyá Isayas ashamtsuk aarmiayi: "Eatkacharua nu Wáitkiarmiayi. Inintruiniatsain wantintiukmiajai." |
| 10 | 21 | Tura Israer-shuaran áujmatuk Tímiayi: "Tuke iniaitsuk Winin winiarti tusan nu shuaran Untsúajai. Tura nakitrurar umirtuiniatsui." |
| 11 | 1 | ¶ Tura Israer-shuar Yúsan umiiniachkui ¿Yus niin iniaisaashit? Pénkea. Warí, wi Israer-shuarchakaitiaj. Wi Apraámsha tura Pinjamin Weeá akiiniachukaitiaj. |
| 11 | 2 | Yámankamtaikniumia Yus Israer-shuaran ni shuar arti tusa achikiu asa yamaikia iniaisashtatui. Ti yaunchu Yúsnan etserin Erías Israer-shuaran pachis Yúsan áujtak Tímiayi: |
| 11 | 3 | "Uuntrú, naman awasar Yus Sútaincha mash saakiarai. Aminiun etserniuncha mash Máawarai. Tura wiki juakjai. Tura winiasha "mantuatai" turutainiawai." Tu áujsamiayi. |
| 11 | 4 | Tura Yus ayak Tímiayi "Siati mir (7000) aishmankan Israer-shuarnumia apujtumsaruitjai. Nu shuar ántar-yus Páaran tikishmatrachu ainiawai" Tímiayi Yus. |
| 11 | 5 | Núnisan yamaisha Yus ti waitnentainia asa Ashí Israer-shuarnumia ni shuarin achikiuiti. |
| 11 | 6 | Yus ni Enentáijiain waitnentak Túraiti. Nú shuar pénker tura asamtai waitnentatsui. Yus aya pénkernak waitnentakka nuikia waitnenkratchainti. |
| 11 | 7 | Ayu. Nuikia Ashí Israer-shuar pénkeran eakaru ain aya Yus achikmia Nú shuar wainkiarmiayi. Antsu ni achikchamuka nuna nankaamas nekaachmin ajasar kusurua Núnin awajnasarmiayi. |
| 11 | 8 | Yus-Chichamsha Núnisan tawai: "Yus Enentáimchatai Enentáin Súsarmiayi. Wáinmashtai jiincha tura ántushtai Kuíshniasha Súsarmiayi. Yamaisha Núniskete." |
| 11 | 9 | Tawitcha yaunchu aak Tímiayi: "Tuke Tunáa Túrin ásar namperan najanainiaksha achinkiar ti Asutniáwarti. |
| 11 | 10 | Ni Enentáin kusurarti tura wainmakcharti. Itiurchat ana nusha, Káarak kijinia aintsan, tuke Aentskatá." Tu aarmiayi. |
| 11 | 11 | Watsek, Israer-shuar Kayá tukumkar ¿tuke iniaararuk ainia? Atsá. Antsu Israer-shuar umirkachmajai Israer-shuarcha yamaikia uwempratin jeainiawai. Nujai Israer-shuarsha nujai métek uwempratniun Enentáimsartatui. |
| 11 | 12 | Israer-shuar umirkachmajai Ashí shuar, Israercha ainia nusha, uwempramnia ajasarmiayi. Nuna nankaamas Israer-shuar atak Yúsan Enentáimtuiniak uwemprarmatai nujai Ashí shuar ti penker ajasartatui. |
| 11 | 13 | Israer-shuarchatirmea, atumin uwempratin chichaman etserkatniun Yus akupkamu asan nu takatan ti takaajai. |
| 11 | 14 | Nuna Túrakun átum uwemprarmena Núnisan niisha, Wíishuar ainia nu, nuna iisar uwemprarat tusan wakerajai. |
| 11 | 15 | Kame Israer-shuaran iniaisamujai Ashí shuar Yusjai shiir nawamnaikiarmatainkia nuikia atak niin achikmajai jakamunmaya nantaktinia aintsan ti shiir átatui. |
| 11 | 16 | Emka apatuk ana nu Yus Súakur yuminsamuitkiunka nuikia Ashí apatkunam Yus yuminsamuiti. Núnisan Numí kankapé pénkeraitkiunka numi takamtsuk pénkeraiti. |
| 11 | 17 | Yuska Chíkich Chíkich Israer-shuaran, Numí kanawen tsupik ajapniua ainis, iniaisamiayi. Tura Nuyá atumin Niisháa numinmaya árumnin nu numiniam anujtamkamarme. Nujai pénker numijiai Tsanínkrum nu kakarmajai iwiaakrume. |
| 11 | 18 | Tura kanawe tsupikmajai nankaamantu Enentáimtumasaip. Warí, ame kakarmarmijiai numi wajatsui antsu ni kakarmarijiai iwiaakme. |
| 11 | 19 | "Túrasha wi anujnaktinian kanawen tsupikchamka" Tíchainmeash. |
| 11 | 20 | Nekasaiti, Túmaitiat niisha Yúsan Enentáimtuiniachu ásar tsupinkiarmiayi. Atumsha aya Yus nekas Enentáimta asam anujnakuitme. Tuma asamtai nankaamantu Enentáimtumatsuk aya anearta. |
| 11 | 21 | Yus nekas kanawe pénkercha Túrawarun tsupikkia Páchitsuk amincha tsupirmakchamniakait. |
| 11 | 22 | Iista, Yus atumjai ti Tsánkaiti tura Israer-shuar umichua nuna ti wari asutiaiti. Tura pénker Wáinmamkata. Yus tuke nekas Enentáimtachkurminkia atumniasha Páchitsuk tsupirmaktatrume. |
| 11 | 23 | Núnisan Israer-shuar ataksha Yúsan Enentáimtuiniakui Páchitsuk ataksha anujkachminkait. Nekas Túrattawai. |
| 11 | 24 | Túram Israer-shuarcha asam Niisháa numinmaya tsupikiar penké numiniam anujnakuitrume. Nuna tura asa nekas ni kanawe tsupikia ajapamun Páchitsuk atak anujkamniaiti. |
| 11 | 25 | Yatsurú, nankaamantu Enentáimtumarairum tusan yaunchu nekaachman ujaajrume. Júiti: Israer-shuarnumianka Chíkich Chíkich Yúsan nekas Enentáimtustinian nakitiainiawai. Tura aya Israer-shuarchasha Yus-shuar ajasarat tusa Túrunamiayi. |
| 11 | 26 | Tura Israer-shuarchasha ti Untsurí Yus-shuar ajasarmatai Nuyá Israer-shuarsha Ashí uwemprartatui. Tuma asamtai Yus-Papí tawai: "Seúnnumia Uwemtikkiartin Tátatui. Israernumia tunaan Asakátrattawai. |
| 11 | 27 | Jú Chichamnasha niijiai najanattajai: ni tunaarin asakturtatjai." |
| 11 | 28 | Uwempratin chicham atumsha nekaatarum tusa Israer-shuaran Yus ni nemasri awajsaruiti. Tura yaunchu ni weatrin achikiu asa nincha tuke anenawai. |
| 11 | 29 | Kame Yus Amáa nuna ataksha ataatsui. Shuáran achiksha atak iniaiyatsui. |
| 11 | 30 | Atumka yaunchu Yus umirchauyarme. Tura yamaikia Israer-shuar umirainiachkui Yus atumin waitnentramarme. |
| 11 | 31 | Núnisan nii yamaikia Yúsan umirainiatsui. Tura atumin waitnentrampramarum Núnisan nincha waitnentrattawai. |
| 11 | 32 | Nujai Ashí métek sumamtikiak métek waitnentrar uwemtikrattawai. |
| 11 | 33 | ¶ Maa, Yus Imiá shiirchakait. Tí nekachukait. Ni Túramu penké nekaachminiaitji. |
| 11 | 34 | "Uunt Yus Enentáimmian ¿yaki neka? Tura ¿ya Niin unuiniaruit. |
| 11 | 35 | Yaki Niin pénkeran susa shiira nujai yapajniuit?" Tu aarmaiti. |
| 11 | 36 | Ashí najanamu ainia nu Yus najanamu ainiak Niiniu ainiawai. Tura Niin shiir awajsatniun najanawarma ainiawai. Yus tuke iniaitsuk shiir Awájnástí. Núnisan Atí. |
| 12 | 1 | ¶ Atumsha Yus-shuar árumna nu, atumek Yusai surumaktarum. Yus ti anenma asakrumin nuna seajrume. Yaunchu Israer-shuar ni waakarin maa Yúsan suu ármiayi. Atumsha Núnisrumek iwiaaku árumna nuin Nii Túrutataj taku Túrutati tusarum tuke Enentáijiai Yusai tsankamaktarum. Yusai iisam ti shiir Atí tusarum Túratarum. Nu Túrakrumka Pátatkechu antsu ti nekas Enentáimjai Yus shiir awajin átatrume. |
| 12 | 2 | Chíkich shuar aya Jú nunkanmaya ana nuna Enentáimtusar wekainiawai. Tura átumka nu Túrawairap. Antsu Yus winia Enentáimmiarun yapajtiurat tusarum tsankatkatarum. Nu Túrakrumka Yus wakera nu nekaattarme. Ni wakeramusha yajauchichuiti antsu Imiá nekas pénkeraiti. |
| 12 | 3 | Yus winia waitnentrak akatar akuptuku asamtai juna Tájarme. Atumek Wíkitiajtai tu Enentáimtumatsuk jeamna nujai métek Enentáimtumasta. Yus Enentáimta asakmin takastinian suramsana nujai apatkam nekaamata. |
| 12 | 4 | Ii ayashi chikichkiitiat ii muchitmari Untsuríinti. Tura métekrak Muchitiáiniatsui. |
| 12 | 5 | Núnisrik iisha, Yus-shuarti, Ayashí muchitmariya aintsarik Untsuríitiatar chikichik ayashtinia aintsar takaaji. Nusha Krístujai tsaninkiu asar aitkiamuitji. Túramu asar nuamtak atsumnaiyaji. |
| 12 | 6 | Ii Túratniun Yus Nusháa Nusháa Súramji Nii wakera nujai métek. Wats, Yus ámin suramsamna nu Túratniuitme. Yus ni chichamen etserkatniun suramsaitkiuinkia Yus Enentáimtakum unuimiarmam nujai métek etserkata. |
| 12 | 7 | Chíkich shuar Yáintinian Yus suramsaitkiuinkia nekas Enentáimjai Yáintá. Unuiniartiniaitkiumka yawetsuk unuiniarta. |
| 12 | 8 | Chíkich shuar Ikiakártiniaitkiumka nekas pénker Ikiakárta. Súsatniuitkiumka shiir Enentáijiai ementutsuk Súsarta. Shuaran Wáinin Atí tusa Yus apujtamsaitkiuinkia ti Enentáimsam Túratá. Tura shuar itiurchat pujuinia nu Yáintinian Yus suramsaitkiuinkia shiir Enentáimsam Túratá. |
| 12 | 9 | Nekas Enentáijiai mai anenai ajatarum. Yajauch nakitrarum pénkera nu Túratarum. |
| 12 | 10 | Nuamtak yachi asarum Núnisrum mai anenai ajatarum. Chíkich wijiai nankaamas uuntaiti tu Enentáimtunaistarum. |
| 12 | 11 | Nakittsuk kakaram ajasrum Ashí Enentáimjai ii Uuntri wakera nu Túratarum. |
| 12 | 12 | Ukunam Yus tsankatramkattajnia nu Enentáimtusrum warastarum. Wáitiakrumsha katsuntratarum. Tuke iniaitsuk Ashí Túrunamujai Yus áujsatarum. |
| 12 | 13 | Yus-shuar atsumainia nujai Yáintarum. Irarsha pénker itiaatarum. |
| 12 | 14 | Yajauch awajtamainia nu shiir awajsatarum. Yus yajauch yumintsuk nu shuaran pénker Túrawarat tusarum seattiarum. |
| 12 | 15 | Warainia nujai warastarum. Kúntuts pujuinia nujaisha uuttiarum. |
| 12 | 16 | Chikichik Enentáijiai métekrak shiir Enentáimtunaitiarum. Nankaamantu Enentáimtumasairap. Antsu péejchach ajastarum. "Ti nekajai" tu Enentáimtumasairap. |
| 12 | 17 | Shuar ámin yajauch awajtamkuisha nincha yapajkiataj tu Enentáimsáip. Aents iisam pénker áminia nu amesha tuke Túratá. |
| 12 | 18 | Ame jeamna nujai Ashí shuarjai nawamnaikiam wekasata. |
| 12 | 19 | Yuska ni Papiriin juna aamtikramiayi: "Wíitjai tunaan Asutiátniun. Wisha yapajkiattajai" tawai Uunt Yus. Tuma asamtai yatsuru, kajertamkuisha atumsha yapajkiairap. Antsu yajauch awajtamkana nuna Yus Iistí. Yus Asutiáti. |
| 12 | 20 | Tura nu arantcha tawai: "Ame nemasrum tsukamakuisha ayurata. Kitiamakuisha umartin susata. Nu Túrakum pénker ajachua nu iniatsaartatme." |
| 12 | 21 | Yajauch nupettamkain. Antsu pénker Túrakum yajauchia nu nupetkata. |
| 13 | 1 | ¶ Akupniunka Ashí shuar umirkatniuiti. Akupniuka Yus apujsamuiti. Yus apujsachma akupin atsawai. |
| 13 | 2 | Tuma asamtai shuar akupniun umirtsuna nu, Yus apujsamun umireachu asa nekas Asutniátniuiti. |
| 13 | 3 | Kame akupniuka pénker shuar sapijmiakarat tusar apujsachma ainiawai. Antsu yajauch shuar ashamkarat tusar apujsamu ainiawai. Nii ashamtsuk pujustin wakerakmeka pénker Túratá. Túrakminkia akupin shiir Enentáimturmartatui. |
| 13 | 4 | Yainmakat tusa Yus apujsamuiti. Antsu yajauch Túrakmeka akupin nekas ashamkatniuitme. Warí, Yus ántar apujsachmaiti. Tunáa shuaran Asutiátniun Yus apujsaiti. |
| 13 | 5 | Nu asamtai akupin tuke umirkatniuiti. Aya Asutiuáwain tusar umirkashtiniaitji. Antsu shiir Enentáijiai wekasatin umirkatniuiti. |
| 13 | 6 | Tuma asamtai Núnisan akupniun kuit Súsatniua nu Páchitsuk susatarum. Nu takatan pujursarat tusa Yus apujsaruiti. |
| 13 | 7 | ¶ Ashí Túratniua nu Túratarum. Akiktiniaitkiumka Páchitsuk akikta. Akupniusha uuntcha Ashí Núnisan írunna nusha shiir Enentáimtikratarum. |
| 13 | 8 | Kuitjai tumashrintin airap. Antsu mai anenai tuke ajatarum. Chíkich shuar aneakum niin pénker Túrattame. Túram Ashí akupkamu Páchitsuk umirkattame. |
| 13 | 9 | Akupkamusha tawai: "Tsanirmawaip, mankartuawaip, kasamkaip, Chíkich shuar tsanumpruraip, chikichna wakerutkaip" tawai. Tura nusha Ashí chikichik chichamjain Tíminiaiti: "Ame ayashim aneam Núnismek Ashí shuar aneata." |
| 13 | 10 | Shuar Chíkich shuaran aneakka yajauch awajsashtatui. Tuma asa akupkamun ti shiir umirkattawai. |
| 13 | 11 | ¶ Ii Yámankamtaik Yus nekas Enentáimtusmiaj nui "Ii ti shiir ajasar tuke uwempratin ukunam átatui" tu Enentáimprachmashiaj~i. Antsu yamaikia nu tsawant yuntumsamtai Ashí Túrajnia nujai shintiarar Enentáimpratniuitji. |
| 13 | 12 | Tuke Káshiitiat tsawaatemprai. Ii Uuntri Kristu Jú Tunáa nunkanam Tátin ishichik ajasai. Tuma asamtai ii Túrutairi kiritniua Núnisan yajauch Túrutai ana nuka Túrutsuk Tsáapninium pénker wekasatin kakaram ajastai. |
| 13 | 13 | Túratniua nujai métek wekasatai. Tsawai wekaakur kiritniunam uumkar Tunáa Túrutai Túrashtai. Nampetsuk, yajauch warartsuk, tsanirmatsuk, jianaitsuk, tura kajernaitsuk aya pénker Túratai. |
| 13 | 14 | Ii Uuntri Jesukrístu Túramia Núnisrik Túratai. Tura ii Ayashí wakeramu umikiat tusar tsankatkashtiniaitji. |
| 14 | 1 | ¶ Shuar Yúsan ishichik Enentáimtana nu itiaatarum tura kakantrairap. |
| 14 | 2 | Iis, Chíkichka Ashí yuamniaiti tuiniawai. Tura chikichcha, Yúsnan awajirar, naman Yúashtiniaiti tuiniawai. |
| 14 | 3 | Tura Ashí Yúa nuka namanken Yúatsna nuna wishikrashtiniaiti. Núnisan Ashí yucha nu Ashí yuun kakantrashtiniaiti. Warí, Núnaka Yus ni shuarin awajsachukait. |
| 14 | 4 | ¿Ameka timiataash pénkeraitiam Chíkich shuar kakantinia? Antsu ni uuntrin ni pénker Túramuncha tura yajauch Túramuncha iischatniukait. Enentáimpratá. Yus kakaram asa niin pénker awajsamniaiti. |
| 14 | 5 | Chikichcha Enentáimpratai. Chíkich shuar tsawantan achikiar "Jú tsawantai Yus nankaamas shiir awajsatniuiti" tuiniawai. Chikichcha Ashí tsawantan métek Enentáimtuiniawai. Ayu, tura ni Enentáimtamun nekas paant nekaatniuiti. |
| 14 | 6 | Chikichik tsawantan Enentáimtakka Yusan shiir awajsatniun Túrawai. Tura Ashí métekrak Enentáimtakka Yúsan shiir awajsataj tusa Túrawai. Yurumkajaisha Ashí Yúana nu Yúsan yuminkias shiir awajsataj tusa Túrawai. Núnisan Ashí Yúatsna nusha Yúsan yuminkias shiir awajsataj tusa Túrawai. |
| 14 | 7 | Iikkia ii Enentáijiain iwiaaktsuji. Tura Jáakrisha ii Enentáijiain jaatsji. |
| 14 | 8 | Kame iwiaaku pujakrisha ii Uuntri Kristu shiir awajsatai tusar pujurji. Tura Jáakrisha tuke Níiniuitji. Nu asamtai iwiaaku pujakrisha tura jakarsha tuke Krístunuitji. |
| 14 | 9 | Kame jakancha iwiaakuncha Ashí ni Uuntri ajastaj tusa Kristu jaka nantakmiayi. |
| 14 | 10 | Tura ¿urukamtai ame yatsum "yajauchiiti" tame. Urukamtai nakitiam? Warí, Ashí iikia ii Túramu paant awajnasat tusar Kristui naka wajastatji. |
| 14 | 11 | Nu asamtai Yus-Papinium tawai: "Wi nekas iwiaaku Pujá asan Ashí Winí tikishmatrurartatui. Tura Ashí "Yus asa tuke pénker Túriniaiti" Túrutiartatui" tawai." Tu aarmaiti. |
| 14 | 12 | Tuma asamtai iisha chikichik chikichik Ashí ii Túramu Yus paant ujakartatji. |
| 14 | 13 | Nu asamtai "yajauch Túriniaiti" tu áujmatnaisashtiniaitji. Antsu ii yachi tunaanum ajuarchatin ti Enentáimturtiniaitji. |
| 14 | 14 | Jesukrístu jintintiamu asan juna nékajai: Yus najanamuka pénkerchaka atsawai. Ashí Túramniaitjai. Túrasha shuar chichaak "Nu Túrushtainti" Táyat nuna Túrakka niijiai tunaiti. |
| 14 | 15 | Tuma asamtai shuar chichartamuk "Nu Yúakminkia Yusjai pénkerchaiti" tai, ame Yúakminkia nu shuar itiurchat Enentáimsashtatuak. Tura niisha tunaanum iniaar menkakamniaiti. Nu shuar aneakum Túratsme. Enentáimpratá. Aya ame yuamna nujain ame yatsum Kristu jarukmia nu Emenkákaip. |
| 14 | 16 | Tura "yuamniaitjai" Táyatam wi Yúakui yajauch áujmatrusarain tusam iniaisata. |
| 14 | 17 | Kame Yus umirkatin Yurumátniujaisha umartinjaisha Enentáimtuschatniuiti. Antsu Yusa Wakaníjiai shiir wekasar Yusjai tura shuarjai nawamnaikiar ti pénker wekasatniuitji. |
| 14 | 18 | Ashí shuar Krístun Núnis umireakui Yussha tura Chíkich shuarsha pénker Enentáimtuiniawai. |
| 14 | 19 | Nu asamtai tuke shiir pujusminia nu Túrakur Yusjai kakaram ajastin Yáiniaiktai. |
| 14 | 20 | Yus iisam Ashí yuamniaitji. Antsu ame yuamna nujai Chíkich shuar tunaanum ajuartin tunaiti. Tuma asamtai ame yuam nujai Yus nu shuara Enentáin takarsamu emesraip. |
| 14 | 21 | Nu Túrashtin nuikia naman Yúashtincha Karía umarchatniusha pénkeraiti. Warí, Túrushtaijiai ame Yátsum itiurchat Enentáimtikram tunaanum ajuarchatapash. Tura nu shuar Yúsan nekas Enentáimtuschamnia ajastatui. Nuka Atsutí. |
| 14 | 22 | Ame Yus nekas Enentáimtakum Ashí Túramniaitkiumka Yúsak wararsata. Shuar Yus iimmianum shiir Enentáijiai mash Túramnia nu nekas Shíiraiti. |
| 14 | 23 | Tura araantushim yua nuka Yúsan shiir Enentáimtutsuk yua asa sumamattawai. Kame Ashí Yus shiir Enentáimtutsuk Túramu tunaiti. |
| 15 | 1 | ¶ Yusjai katsuaru ájinia nu iik Enentáimtumatsuk kakarmachu ainia nu Yáintiniaitji. |
| 15 | 2 | Chíkich shuar wakeramu Enentáimtustiniaitji. Tura Yusjai nu nankaamas shiir wekasatniun Yáinminiaitkiui Túratniuitji. |
| 15 | 3 | Krístusha ni wakeramun Túrachmiayi. Antsu Yus-Chicham tana Núnisan chikichnan Enentáimtusmiayi. Nu asamtai Yúsan umirin asa Wáitiak timia nu aarmaiti: "Amin katsekramainiak Winiaja katsekrukarmiayi." |
| 15 | 4 | Núnisan Ashí yaunchu Yus-Papinium aarma iin jintintramatniun aararmiayi. Nujai atsantamkurin shiir Wáinkiattajnia nuka katsuntrar Nákastatji. |
| 15 | 5 | ¶ Yus atsantamar katsuntratniun jintintramji. Tuma asa Jesukrístu Túramia aintsan atumniasha chikichik Enentáijiai Enentáimtunaisar pujustinian Yáinmakartí. |
| 15 | 6 | Nujai Ashí métekrak Yus shiir awajsattarme. Niisha ii Uuntri Jesukrístuncha Aparínti. |
| 15 | 7 | ¶ Tuma asamtai Chíkich shuarjaisha shiir awajnaisatarum. Kristu Núnisan Yúsan shiir awajsat tusa incha shiir awajtamsamiaji. |
| 15 | 8 | Juna tajai. Kristu Israer-shuaran Yáintaj tusa Támiayi. Tura Yus ti yaunchu nuna weatrin "Túrataj" timia nu uminkiat tusa Támiayi. Nujai Yus timia nuna umikmia nu nekaamniaiti. |
| 15 | 9 | Tura nu arantcha Israer-shuarchasha Yus waitnentrartin ásarmatai niin shiir awajsarat tusa Támiayi. Tura Yus-Papisha tawai: "Amin kantamprakun Ashí shuarnum shiir awajsattajme." |
| 15 | 10 | Tura nu arantcha tawai: "Ashí nunkanmaya shuartiram Ashí Israer-shuar Yúsna ainia nujai warastarum." |
| 15 | 11 | Tura ataksha tawai: "Ashí aents ii Uuntrin shiir awajsarti. Tura Ashí shuarsha Niin "Ti uuntaiti" Tiartí" tawai. |
| 15 | 12 | Isayassha aarmiayi: "Tawitia Aparí Isai weatriya akupin akiinkiattawai. Niisha Ashí nunkan akupeakui Ashí shuar niiniak shiir Enentáimtusartatui." Tu aarmaiti. |
| 15 | 13 | ¶ Yus Ashí Shíiran suramsattakrin nu shiir Nákaji. Tuma asamtai Nii nekas Enentáimtakrumin warasa shiir pujustinian Yamái suramsati. Nuyá Yusa Wakaní kakarmarijiai ti shiir Enentáijiai katsuntrarum, nu Nákastarum. |
| 15 | 14 | ¶ Yatsurú, atumsha anenainiaitrume. Tura Ashí Yusna nekaarum nuamtak chicharnaikiatin nékarme. |
| 15 | 15 | Tuma ain kajinmatkiirum tusan ataksha ti paant aakun Jú Enentáimtikeajrume. Yus winia waitnentrak ni Chichamen etserkat tusa akuptakui nuna aatjarme. |
| 15 | 16 | Kame Jesukrístu Israer-shuarchanum Yusa shiir chichamen etserkat tusa akuptukuiti. Nuna Túrakun Israer-shuarchan Yusa Wakaníjiai shiir awajsamu ásarmatai Yusai juiniajai. Tura Yussha shiir Enentáijiai itiainiawai. |
| 15 | 17 | ¶ Jesukrístu yaintiu asamtai Yusna takarsamaj nuna wararsamniaitjai. |
| 15 | 18 | Tura Chíkich shuarjai Kristu Túramun pachischattajai. Aya wi chichasmajaisha tura wi Túramujaisha Israer-shuarchan Kristu umimtikiamia nunak áujmatsattajai. |
| 15 | 19 | Yusa Shiir Wakaní kakarmarijiai aents tujintiamun Túran Ashí shuaran Jerusarén péprunam nankaman etserkin Iririkiu nunkanam ejekamjai. Kristu-chichaman Ashí nu nunkanam etserkaitjai. |
| 15 | 20 | Nuna Túrakun Chíkich shuar etserkachmanum Krístunun ántichu ainiamunam Uwempratin Chichaman etserkaitjai. Nujai Chíkich takasmanum takarsachuitjai. |
| 15 | 21 | Yus-Papisha Núnisan tawai: "Chichaman penké antukcharuka nekaawartatui. Niin áujmatman anturkacharusha unuimiarartatui." |
| 15 | 22 | ¶ Nuna pujuru asan iitjarum Táyatan iichmajrume. |
| 15 | 23 | Tura yamaikia Juyá takatrun umikian tura Yáunchusha tuke iitjarum tiniu asan |
| 15 | 24 | Ispania nukanam wéakun iistatjarme. Tura Atumíin shiir irasan Ispanianam wéakui atumsha yaintkiarum shiir akuptukchattarpash. |
| 15 | 25 | Tura yamaikia kuitjai Jerusarénnumia Yus-shuaran Yáintaj tusan wéajai. |
| 15 | 26 | Masetúnianmaya shuarsha tura Akayanmaya shuarsha Kuítian irurar Jerusarénnumia Yus-shuaran atsumainia nuna akuptuktai tuiniawai. |
| 15 | 27 | Ti wakeruiniak Túrawarmiayi. Nu nekas Túrashtinkiait. Israer-shuarnumia Yus-Chichaman antukaru ásar yamaikia ni Kuítrijiai Páchitsuk Yáinchatniukait. |
| 15 | 28 | Tuma asamtai Jú kuitian Súsaran umiran nuikia Ispanianam wéakun iiktiatjarme. |
| 15 | 29 | Tura nui winiakun Kristu Shiir Chichamen nujai shiir Yáintajrum tusan ejeetittiajrume. |
| 15 | 30 | ¶ Yatsurú, ii Uuntri Jesukrístunu asarum tura ni Wakaní pujurtamkurmin anenia asarum Yus áujtursatarum. Núnisrum wijiai métek Yusna takastin yaintkiattarme. |
| 15 | 31 | Jutia nunkanmaya Israer-shuarnumia uwemtikrat tusarum Yus áujtursatarum. Tura Jú kuitian Júajna nunasha Jerusarénnumia Yus-shuar shiir Achikiartí tusarum Yus áujtursatarum. |
| 15 | 32 | Nujai, Yus wakerakuinkia, pénker Wampú Enentáimsan warasan iittiajrume. |
| 15 | 33 | Yus ti shiir pujustinian Súana nu atumjai tsanin pujurtamsati. Núnisan Atí. |
| 16 | 1 | ¶ Ii umai Jépeka Senkrea péprunmaya Yus-shuaran Yáiniaiti. Ti penker Yus-shuaraiti. |
| 16 | 2 | Kristu Náariin shiir Wáinkiatarum. Nuamtak Yachí Wáinkiatniua Núnisrum Wáinkiatarum. Niisha chikichnasha tura winiasha ti pénker Wáitin asamtai atumsha ni atsumamusha yaintarum. |
| 16 | 3 | Pirisirasha Akirasha wijiai métek Jesukrístunun takasaru ásar amikmaatainiajai. |
| 16 | 4 | Niisha winia uwemtikrurtai tusar Jáninkiarmiayi. Tuma asamtai yuminkiniajai. Tura aya Wíkichu antsu Ashí Israer-shuarchanumia Yus-shuar ainia nusha yuminkiniawai. |
| 16 | 5 | Núnisan Ashí Yus-shuar Pirisiran tura Akira jeen irunainia nusha amikmaatarum. Tura winia aneamu amikiur Epenetu amikmaatruatarum. Niisha Akaya nunkanam emka Krístun nekas Enentáimtusmiayi. |
| 16 | 6 | Marisha, atumjai ti takasua nu amikmaatruatarum. |
| 16 | 7 | Tura Wíi shuarsha Antrunikiusha Júniassha amikmaatruatarum. Niisha wijiai sepunam pujusarmai. Wijiai emka Krístun shiir Enentáimtusar Chíkich akatramujai nankaamas takasaru ainiawai. |
| 16 | 8 | Ampriassha Krístunam winia aneamu amikiur asamtai amikmaatruatarum. |
| 16 | 9 | Urpanujaisha Jesukrístu Takatrí tsaninniuitji. Niisha tura aneamu Estakissha amikmaatruatarum. |
| 16 | 10 | Apirissha amikmaatruatarum. Niisha Krístun ti shiir Enentáimtamu ti Páantaiti. Núnisan Aristúpuru shuarsha amikmaatruatarum. |
| 16 | 11 | Wíishuar Erutiúnsha tura Narsisu shuarsha Kristu shuari ásarmatai amikmaatruawarta. |
| 16 | 12 | Tripiniasha tura Tripiusasha Yúsnan takainia ásarmatai amikmaatruatarum. Núnisan ii umai Pírsitia Yúsnan ti takasu asamtai amikmaatruatarum. |
| 16 | 13 | Rúpusha, nusha ti penker Yus-shuar, tura Nukurísha amikmaatruatarum. Niisha wijiai nekas winia nukurua Núnisaiti. |
| 16 | 14 | Asinkritiusha, Pirikiuntisha, Ermassha, Patrupassha, Ermessha, tura Ashí niijiai Yús-shuar ainia nu amikmaatruatarum. |
| 16 | 15 | Núnisan Jirurukusha, Júriasha, Néreusha, ni umaijiaisha, Urimpiassha, tura Ashí Yus-shuar niijiai pujuinia nu amikmaatruatarum. |
| 16 | 16 | Nuámtaksha shiir aujnaisatarum. Ashí Juyá Kristu shuari amikmaatmainiawai. |
| 16 | 17 | ¶ Yatsurú, shuar Nusháa Enentáimtuiniak Yus-shuaran akanainiak itiurchat awajenawai. Nu shuar Wáinkiarum kanaktiarum. Ni yajauch Túramu átum pénker takastin unuimiarmena Núnischaiti. |
| 16 | 18 | Nu shuar ii Uuntri Jesukrístunun takainiatsui. Antsu ni wakeramun uminiawai. Tura ti shiir chichasar nékachun anankenawai. |
| 16 | 19 | Atum umirma Ashí shuar nékainiakur ti waraaji. Yajauch Túrutsuk aya pénker Túratin Enentáimsarum pujustarum. |
| 16 | 20 | Yus tuke shiir pujustinian amawa nu ti Wárik uunt iwianchin nupetturmaktatui. Tura ii Uuntri Jesukrístu shiir yainmakarti. |
| 16 | 21 | ¶ Timiutéusha, wijiai takau, amikmaatmarme. Núnisan Rúsiusha, Jasunsha, Susipatresha, mash Wíishuar ainia nu amikmaatmarme. |
| 16 | 22 | Wi, Tersiu asan, Papru chichamen ju papinium aateakun Kristu Náariin amikmaajrume. |
| 16 | 23 | Káyusha amikmaatmarme. Ni jeen pujaji tura juisha Ashí Yus-shuar irunainiawai. Erastusha ju pepru Kuítrin Wáinniuiti. Niisha ii yachi Kuártujai amikmaatmarme. |
| 16 | 24 | Ii Uuntri Jesukrístu ti shiir yainmakarti. Núnisan Atí. |
| 16 | 25 | ¶ Watsek, Yus shiir awajsatai. Ninki nekas kakaram awajtamsamniaiti. Wi Uwempratin Chichamnum Jesukrístunun étsereaj nujai ikiantamprattawai. Nu chicham Yámankamtaiknumia nekaachmanak Yus yamaikia paant awajsaiti. |
| 16 | 26 | Yaunchu Yúsnan etserin ni aarmanum nu chichaman etserkarmiayi. Tura yamaikia Yus wakerak Ashí nunkanmaya shuar Nii Enentáimtusar umirkarat tusa nu Chichaman yamaikia paant awajsaiti. Yus amuutsuk tuke pujuwiti. |
| 16 | 27 | Yúsak Ninki ti neka asa tura Jesukrístu ti penker tura asamtai Ninki tuke shiir Awájnástí. Nuke Atí. |